姜濤新曲Wyman填詞「偏要當一粒薑糖」：呢行好多誘惑，好易令人迷惘

MIRROR 日前公布即將開演唱會，立即掀起內部認購搶飛潮，同時成員姜濤推出本年度首支新歌《Master Class》，歌曲由黃偉文（Wyman）執筆，意旨簡單做自己，拋開舊有傳統以迎接新事物。

姜濤早前為新歌拍攝MV，又跳又唱又玩火，打破過往風格，他表示新歌對他來說別具意義，除了滲透著個人元素外，也是他入行以來第一首真正的跳唱作品，姜濤說：「之前都想推出跳唱歌，不過就有啲難，一來自覺得不及我『師父』Anson Lo（盧瀚霆）啲跳唱，二來MIRROR好多隊員都出咗個人快歌，所以我希望以另一種舞蹈形式展現畀大家。」

為了今次MV，姜濤又跳又唱拍足一整天，他表示：「最辛苦反而係錄歌時，因為呢種曲風香港比較少有，唔知觀眾會唔會接受，所以錄呢首歌嘅感覺同以往唔一樣，要唱到嗰種感覺要花上苦功，其實出呢首歌之前，我都喺IG同大家講過呢首歌係有史以來最難唱，難就係難在表達方式。」今次的製作團隊、導演都是首次合作，姜濤希望將新的音樂元素帶給大家，他亦感謝ERROR成員肥仔（梁業）介紹排舞導師給他。

《Master Class》歌詞中，提及前輩給予後輩不少意見，現實中亦有前輩給他一生受用的意見：「我參加《全民造星》時，Eric Kwok（郭偉亮）曾經講過『當迷失自己時，諗吓自己當初點解入呢一行』，我一直都好記得呢句說話，因為呢一行好多誘惑，好容易令人迷惘。」

《Master Class》是繼去年底姜濤勇奪《2020年度叱咤樂壇流行榜頒獎典禮》「我最喜愛的男歌手」及「我最喜愛的歌曲大獎」後首次推出新歌，姜濤坦言最初覺得攞完獎之後的第一首歌好大壓力。「會諗構思咩歌唔好令大家失望，但到後來諗番轉頭，唔需要理太多，只要做自己鍾意做嘅嘢就得，承接番首歌嘅主題。」