Ray Online｜何敬康繼「包場」睇戲後終遇「爆場」戲院撐港產片　自爆認識衛詩雅

行街、睇戲、食飯係香港人嘅「直落」拍拖節目，不過新民黨立法會議員何敬康周末夜晚去中環戲院睇戲，點知唔小心「包場」，得佢同老婆兩個觀眾。佢噚晚同老婆再出動，終於遇到爆場嘅戲院，一齊撐港產片。

何敬康喺社交網站分享同老婆喺戲院嘅合照，原來係睇《破·地獄》嘅首映場。佢大讚係一套非常寫實嘅港產片，黃子華同許冠文嘅表現好出色，不過佢話尤其欣賞衛詩雅嘅演出。原來佢咁講係有「私心」㗎，同《am730》記者透露原來佢以前同衛詩雅嘅未婚夫係鄰居，所以都認識衛詩雅，兩對愛侶周不時出嚟食飯，知道衛詩雅用咗好多心機拍呢套戲，今次專登嚟捧場。

容海恩和袁彌昌亦是座上客

除咗兩對愛侶嘅合照，睇返何敬康喺戲院打卡嘅相，原來有「彩蛋」，後面幾排就係佢黨友容海恩同老公袁彌昌，容海恩仲好趣緻舉住「YEAH」手勢「攝鏡」。何敬康話係咁啱撞到，喺戲院樓下已經見到，真係有緣啦。

何敬康話睇過無數咁多嘅港產片，可以話係喺港產片薰陶下長大嘅一代，一定全力支持香港電影業。而香港曾經係「東方荷里活」，年產幾百部電影，係巨星輩出、人才濟濟嘅娛樂夢工場。佢覺得香港只要有好戲，唔會冇人睇嘅！

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)