由戶戶送，變為戶戶無得送，2015年嚟插旗嘅Deliveroo，3年又3年，3年又3年，最後10年都捱唔到。好多人一嚟就歸納原因係不敵Keeta。無可否認，Keeta出銀彈搶客搶車手呢招好有效，因為成個業務模式，就係車手，食肆，同埋客，3方面基本你肯燒錢就會有人埋嚟。但Keeta係咪咁大影響力先?
睇返一啲媒體整合數據，2023年第一季foodpanda同Deliveroo市佔率，按交易額睇係70:30，按訂單量睇係69:31。去到2024年第一季foodpanda: Deliveroo: Keeta市佔率，按交易額睇係37:20:43，按訂單量睇係44:24:32，論受影響foodpanda更大，交易額佔比無咗接近一半。
為咗搶佔市場，Deliveroo可謂不惜工本，請好多星級代言人，包括古天樂、鄭秀文、林海峰等，以Marketing角度當然夠哂睇頭，但問題係，請代言人比foodpanda更積極都好，你都搶唔到市場，證明呢個市場，代言人唔係最大關注點，畢竟幫襯你嘅朋友，係食外賣，唔係食林明禎或者林嘉欣。請佢哋做代言人，但收費高，車手質素差，平台有事又唔負責的話，無論喺電視播幾多廣告都係無補於事。最大問題係，粒粒皆星，唔使錢咩，錢使咗但搵唔返，只能認輸，只係咁啱Keeta出現，加速咗Deliveroo離場。
對用家同車手接住落嚟要考慮的，係Keeta會唔會繼續燒錢。當然唔敢寫包單，但Keeta阿媽美團都係靠燒錢起家，由2018年上市公告嘅業績開始睇，2017到2023期間，面數賺錢只得3年，平均每年蝕205億人仔。蝕錢都咁燒錢，所以相信會燒多一段時間錢，直至可能同foodpanda的市佔率大約7:3，甚至8:2左右，控制咗個市場就會減少燒錢。所以如果用家同車手想一直有更多優惠，就要好好學下點同Keeta博奕。
而外賣app情況，都可能對CALL車圈有指引性。現時CALL車圈大致可分為UBER同的士，嚟緊幾個的士車隊都會陸續投入服務，齋睇媒體報道，車隊好似都有啲誠意，不過唔知服務質素會唔會好咗，始終揸車嘅咪又係嗰班。而且條條車隊都似乎會有自己app，皮費大咗，同埋加埋都係3,500架的士左右，資源肯定無UBER咁整合同豐富。有幾多人會特登幫襯呢啲車隊，真係睇下會唔會新屎坑三日香。
而且最重要係，政府會唔會正式開放高德同滴滴落嚟，同UBER一齊正式玩，如果佢哋入埋嚟香港市場，啲的士車隊就會正式畀人割韭菜，因為佢哋資源同訊息量肯定同CALL車APP有好大落差，佢哋亦無能力整合全香港18,000幾部的士抗衡。唔好覺得高德同滴滴嚟係天方夜譚，呢度一直講，香港會融入大灣區，你睇香港樓市呢個時勢，都要繼續搞北都，曾經提出過，要融入大灣區，兩地物價就要貼近，大陸而家經濟情況，究竟深圳樓升上嚟易啲，定係香港樓跌落去易啲？香港政府話咗畀你知了。
金缸經
註：專欄作家言論不代表本網立場
密切留意BossMind動向！立即CLS