藝人梁靖琪(Toby)於4月時誕下幼子施睿安(Rian),貴為兩子之母的她,最近更進軍飲食界!Toby聯同老字號品牌合作推出月餅,背後原因竟是為了想家人健康慶中秋,如此愛心滿瀉,當然獲得一班好姊妹支持!
自從升呢「媽媽」身份,Toby為照顧小朋友已耗盡個人時間,暫時難以接拍劇集,卻把握今次機會延續自己的事業夢。她說:「我好鍾意煮嘢食,之後就諗,不如試一試做月餅,我一向好重視家庭。」而她還有顆暖暖的「私心」:「好想買到適合屋企人食嘅月餅,Daddy(梁家樹)好鍾意食月餅,老爺、奶奶亦好鍾意食甜嘢,但始終年紀唔細,爸爸又有糖尿病,所以都想佢哋食得健康,今次做月餅着重健康材料,會用海藻糖代替白糖,令糖分減半,等大家可以同家人一齊分享。」
孝順的Toby亦不忘氹老公開心,特意在月餅加入非傳統味道,就是老公的至愛口味:「老公好鍾意斑蘭味蛋糕,所以我提議月餅師傳不如試吓做呢隻味,點知效果出嚟真係perfect match。」Toby今次揀選逾七十年歷史的文樂園合作,一來是老字號,二來是之前曾合作過,值得信賴。
另外,日前Toby就親自為月餅拍攝廣告,大晒產後火速收身成果,化身「愛心做餅師」,一絲不苟地體驗做餅流程。「雖然我平時喜歡下廚,但唔係成日整甜嘢,所以完全被考起,其實整月餅一啲都唔容易,我學咗一段時間,但本身手腳不協調,絕對有進步空間,不過唔緊要,我去學整餅嘅主要目的,係希望對自己嘅生意更清楚了解。」問到今次Toby生招牌做月餅,好姊妹「七魔女」可有第一時間「落單」支持?Toby則笑說:「有呀!佢哋好支持,打咗支強心針,不過今次始終係第一次,只係想試吓,唔係推出好多,所以我叫佢哋唔好訂咁多,希望外邊多啲人可以試到我嘅月餅。本身計劃日後喺唔同節日:聖誕節、新年等都可以推出唔同產品,等大家品嘗。」
東網網站 : https://on.cc/東網Facebook專頁 : https://www.facebook.com/onccnews/
留言 0