42歲卓韻芝早前為義賣為烏克蘭籌款10萬元，之後今次就輪到為香港派送員發聲。事源早前有人拍到一張派送員在路邊吃飯的照片，但竟然是為了去屋苑投訴「影響環境」不衛生問題，惹來大量網民討論。卓韻芝就表示「此種公審者有多偽善，無謂浪費筆墨恥笑，我反而想講香港速遞員有幾厲害，地球表面要算數一數二。」用超長文讚香港派送員好勁。
卓韻芝說因為之前拍電影而做過資料搜集，亦遇過超高轉數的派送員、速遞員。她留言：「今日有單『速遞員坐街邊吃飯盒』，被人影晒相，公審其「影響環境」；此種公審者有多偽善，無謂浪費筆墨恥笑，我反而想講香港速遞員有幾厲害，地球表面要算數一數二。」
再補充說香港地做派送員不容易：「首先，相比世界許多城市，在香港寄件的費用可謂極度便宜，而且派送速度奇高，好喇，咁如此廉價，就要追速度——即是高速派送勁多件，一日之內接貨、送貨重複走幾轉，先至圍到皮。好多海外地區所謂『速』遞，一點都不速，香港呢，兩日收不到貨，個客已媽媽聲。」
她知道得多，原來因為年前拍過電影《失戀急讓》：「因為幾年前導演《失戀急讓》，Angelababy嘅角色係做速遞嘅，做過資料搜集，跟過速遞員開工，不過套戲係喜劇，沒有拍得太深入。」
之後提到真人真事：「速遞講求體力，咁好多工種都講究體力，而速遞之重點，就是「速」：你個心好急，因為慢少少，真係派唔晒，而派唔晒，係你嘅問題，唔係公司嘅問題。一件事，快做vs慢做，兩種壓力。大時大節，好多件，咁你要點？派快啲囉！上帝不會給你多一天。地鐵車廂內分件，可能好多香港人都見過。
我見過一位派送（即是『派送員』，佢哋都係咁叫自己，有啲位叫「腳仔」，有啲叫「線位」、「車手」。太仔細我不清楚，本人講錯就留言話我知啦），工廠大廈，佢一入電梯，按兩層——假設係3樓同7樓先算——到3樓，電梯門打開，佢即刻跑去304室（因為佢已經熟背304室係邊一個方位、邊一個門口），然後即刻衝返入電梯——點解可以做到呢？因為佢知道呢棟工廈部電梯好慢，任電梯中人如何狂按閂門，部電梯閂門嘅時間，仍然足夠佢衝返入嚟。好喇，佢成功派完304，衝返入電梯，等電梯上7樓，期間佢做咩呢？就係掀吓個袋裡面有咩件，然後進入沉思狀態，腦中設計一陣嘅派件路線。真係嘆為觀止。兩份件都如此，不妨想像他一天如何度過。
佢沉思完，仲有時間打鋪機，電梯先至到7樓。吹咩。
唔見貨，有公司會叫派送自己嘔返舊錢出嚟。你中covid，你嘅事。你可能要抬嘢上樓梯，亦可能抬完上去發現地址錯誤。三急，要摸通所有廁所位置，不過首先要學忍得。有啲細公司，連送運袋都冇，打份工，連個袋都要出埋。心志脆弱少少都做唔到。
最正係，總括而言，香港嘅速遞員要算非常好脾氣（唔知同打機舒壓有冇關係，但個心咁急都保持到如此calm，我等中女真係要學吓，幾咁mindfulness）。最後，香港嘅地址，其實沒甚系統可言，GPS是可以幫手，但到最後，要依憑記憶，才可加速……我懷疑，最熟悉香港嘅人，其實係速遞員。」