容祖兒病住再踏叱咤舞台想喊又想笑　讚Gareth.T可愛得有點抽象

容祖兒早前現身《2024年度叱咤樂壇流行榜頒獎典禮》，相隔6年再踏頒獎台，憑《九秒九》獲叱咤十大第3位歌曲獎。今日（4日）她在社交平台分享當晚再參與頒獎禮的感受，提到自己當日病住上台但好開心，又提到：「回憶番哂嚟﹗」

容祖兒分享多張當晚台上台後的照片，寫道：「Just let u know﹗一月一號，雖然病，但好開心，好熟悉嘅環境，好多老朋友，小儀親切地宣佈，我輕鬆又興奮地行上舞台，又想喊又想笑；後台見到森美阿如朱薰阿禮… 回憶番哂嚟﹗」

容祖兒又感謝歌曲《九秒九》令她再踏頒獎台，並多謝作曲的湯令山（Gareth. T）與Teddy Fan，以及作詞的Wyman黃偉文。「感謝Y一手包辦由構思到開始錄製到mv到一切後著總軍師這重任，也因此認識Gareth他的可愛有點抽象，但是我好get！上年20231223約見面上studio和Teddy一齊jam，其實我手頭上仲有兩首佢嘅demo，不如做埋佢。」

當日病住上台，容祖兒感激化妝師將正在生病的她還原靚樣：「將面如死灰的我拯救。」最後又許下新一年的願望：「新的一年，唔好再病，九秒九好番，我會乖㗎啦，鼻塞透唔到氣好辛苦！」