我認，係我膚淺兼見識少，以為運動品牌成立嘅跑會都離不開媽屐婷嘢、品牌策略宣傳居多，去過New Balance Run Club (NBRC) 之後令我完全改觀，我井底，我錯!
NBRC成立超過10年，由本地知深跑手蔡達明於七年前開始接管，及後再邀請其得意門生葉雅傑加入並一同任教至今，有聲有色有口啤，重點，有心!
見微知著，NBRC 唔少安排都出奇地細心，例如每學期(兩個月)均轉換訓練場地，由深水埗運動場、斧山道運動場以至沙田運動場，走遍港九新界但絕不山旮旯，地點定必交通便利，此舉除帶嚟新鮮感亦公平地遷就不同地區學員。因此，NBRC 每學期動輒吸引百幾二百人參加，場面墟冚。深知人多勢眾可能會對運動場內其它使用者構成影響，NBRC 更為學員提供行李車以減少 locker 佔用，難得嘅細心又窩心。
訓練上，蔡Sir同葉Sir亦作出十分仔細嘅安排，除劃分不同組別讓學員按自己能力及當晚狀態自行入組外，仲可以揀選場內衝圈或街跑訓練，街跑路線更有長短任擇，好玩。可惜當晚被 Peter 老點咗喺場內衝圈，佢自己就同 Gabriel 出街玩….#%&*XYZ
更細心嘅係每組均有專屬 Core Member 帶領練習，照顧及鼓勵前中後唔同程度學員。點可以成為 Core member ? 就係得到教練推薦，跑班有晉升機制，又幾過癮。
跑會嘅成立絕對有其價值，蔡Sir承認練習係較悶及刻苦，運動場嘅衝圈訓練更甚。而透過一班人互相推動，彼此嘅鼓勵同付出而獲得好成績，嗰份快樂係幾多錢都買唔到的。頒獎台永遠只夠寥寥數人站上，但每位盡過最大努力嘅跑手，哪管PB只快一分鐘，都已經係一種自己肯定。
但我深信並唔係所有學員都能承受咁高強度嘅訓練，如果每次嚟到都跑得太辛苦，應該好快放棄。反而能夠喺一個適合自己強度嘅狀態下慢慢進步，慢慢去突破自己，咁樣先會有真正嘅進步。無可否認，蔡Sir同葉Sir喺呢方面找到很好嘅平衡。
商業掛帥嘅消費市場，資源充裕跟誠意從不掛勾，縱然NBRC屬免費參與，難得仍以人為本，細緻度由drop bag安排、揀選練習地點，以至如何令學員享受訓練過程均處理得一絲不苟，無論打算嚟搏命抑或以輕鬆心情完成訓練均能樂在其中，NBRC確然令人動容兼刮目相看。
The post 尋找跑會的故事 #05 | NBRC 運動品牌嘅免費跑會都有好嘢?! appeared first on Fitz 運動平台.
留言 0