杜琪峯接受BBC訪問談創作自由　「冇咗靈魂，我同香港都冇埋」

導演杜琪峯一向出名敢言，繼去年為柏林影展擔任評審，在開幕記者會上批評極權扼殺電影自由外，接受BBC訪問的影片今日（2日）出街，他在片段中繼續發揮直率性情，大談幾年沒有新作品並非不想拍戲，而是「落唔到筆」，更坦言：「我覺得而家冇咗靈魂，包括我同香港都冇埋。」

杜琪峯憑獨特浪漫暴力美學被譽為「香港黑幫教父」，除了在金像獎及金馬獎分別獲得三次最佳導演獎，不少作品更揚威國際影壇，作為香港代表影人之一的他近年卻明顯減產，杜琪峯接受BBC訪問，感慨表示最近是他人生最低潮的時候，透露受環境影響：「感覺到原來人好脆弱，如果郁咗一啲嘢，係你平常係習慣咗嘅，其實原來會影響到你好多嘅思維，喺呢個環境下，我以前對構思上，同埋對電影嘅信心好強，呢幾年會覺得好多懷疑，變咗諗完一次又揼咗，諗完一次又揼咗，都唔知諗咗幾多嘢，究竟係我想要定係我作狀㗎，搵唔到真嘅自己。」

杜琪峯在訪問中透露最近有開工創作，但幾個月才開一日，雖知自己不是江郎才盡，又不能變出什麼東西，他感嘆：「我一直以嚟都堅持喺香港拍戲，香港對我好重要，我覺得而家冇咗靈魂，including（包括）我同香港都冇埋，唔知啊，要等到有啲嘢改變我嘅觀念，因為個價值觀唔同咗嘅時候，好多嘢都覺得錯，咁係咪要將我嘅價值觀完全改呢，呢個係我好大嘅問題。」而被問到覺得原本的靈魂是什麼，他直言：「自由，言論嘅自由，簡單啲講就係人權同自由。我會覺得係同我生活咗幾十年嘅香港好大分別。」

杜琪峯在國際影壇享負盛名，他透露有很多機會去外國拍戲，但都被他拒絕，他解釋：「原因就係我連香港，自己成長嘅地方嘅文化我都捉得唔夠準，點樣仲去學人哋嗰樣嘢，或者去描述人哋啲嘢呢。香港而家嘅情況，電影工業上面又好，藝術上面各方面嘅嘢，都唔係一個好嘅時代。我哋好嘅時代我哋見到係一個點嘅香港嚟㗎嘛，如果個個都唔喺度嘅時候，喺我嘅世界裏面覺得我背叛咗香港，所以又要自己留喺度，又唔知自己想做乜。」他坦承目前是從影以來最難的時候，直指以前沒有錢但不代表沒有理想，但不敢說死現在就完全沒有理想，而是要考慮未來要否繼續電影世界，去征服自己或學習其他東西。

訪問中提到杜琪峯的代表作《黑社會》系列，十幾年來多次被催拍第三集，但他早前在一場放映會卻稱拍完要「放逐」，他指大家都心知肚明背後意思，他表示曾想在2010年拍《奪命金》前拍《黑社會3》，惟當時有感社會氣候不太適合：「但我喺入面諗嘅所有橋段呢，發生嘅事呢，都發生咗。」他補充黑社會世界亦不如以往，「兄弟」亦已不復存在：「根本你哋已經散晒，但係都維持講緊『election（《黑社會》英文片名）』嘅，咁『election』有冇作用呢，係我當日嘅命題嚟，咁當然基於好多理由冇拍。」至於經過十幾年，想法有沒有改變，杜琪峯表示隨着所住的地方的文化發展，要抓着時代的脈搏或將理念放在電影中，想法也要不斷更新，他解釋：「如果大家明白嘅話，你會睇到黑社會嘅而家變咗點，你如果老實啲講個源頭係邊度影響到佢嘅呢，咁你知道你講緊乜嘢。」