本周二（19日），豬肉檔威威（劉宋威）終於除罩見真身，之前強調唔除口罩係因為屋企有小朋友，防疫好重要咁話，但接廣告就可以除罩呢點被網民質疑，「而家又唔理小朋友嘞？」網民太好記性真係麻鬼煩。
因為帶口罩斬豬肉斬出個未來，又開YouTube Channel又做訪問又上封面又開Fans見面會仲拍埋廣告上電視，威威果然真係好威威。不過，網民從來最難服侍，之前係咁問威威幾時除罩？家陣除咗嘞，又叫人都係戴返佢，仲惡搞佢嘅真樣，笑佢似50歲大叔，又話佢似呢個似嗰個，仲有網友好有心，整咗個「威威成功語錄」，仲話威威靠嘅係一塊厚面皮，同埋一股自己唔會尷尬嘅感覺。喂，你班人唔好咁黐線啦。
《星島頭條》短訊問威威點睇自己個除罩樣被惡搞？問佢有冇唔開心？曾因為想証明自己冇呃過女人同冇吸毒而自費去驗頭髮嘅威威表示：「一笑置之」，威威嗰種百毒不侵真係好勵志亦好有型，難怪班威威豬（Fans暱稱）咁冧啦。
星島新聞集團慶回歸25周年專題網站，請即瀏覽
立即下載 | 全新《星島頭條》APP : https://bit.ly/3yLrgYZ
