周嘉洛同陳瀅合作玩得埋，但只限友誼。
周嘉洛、陳瀅、朱敏瀚、王灝兒（JW）、張頴康、麥美恩、韋家雄、李君妍、梁雯蔚、陳詩欣、黃婧靈、陳欣茵、李芷晴等，今日於電視城為新劇《痞子殿下》之「Welcome to 首振鎮」進行宣傳，周嘉洛與陳瀅首次擔正，自然有點壓力，但回想去年一班人演戲，相當開心，陳瀅自言愈拍愈肥，「拍的時候係最瘦，因為監製拍之前叫我減肥，著古裝上鏡會拍得比較肥，所以開劇時係最瘦，但我同JW反而愈拍愈肥，大家睇到最後幾集會發覺我哋面都圓埋，因為我哋好貪玩，拍完通宵，只得兩小時休息都唔會瞓，仲走去食早餐，寧願唔瞓都一齊玩，仲不停食雪條。」問到與周嘉洛可有戲假情真？「我哋幾個都一齊撻着，但任何人都無任何愛情元素，只係友誼。」
《痞子殿下》宣傳。
周嘉洛繼劇集《回歸》飾演郭晉安兒子後，他與郭晉安同樣緊接各自又有新劇播出，「只係咁啱播出嘅劇擺埋一齊，我點可以同郭晉安比，大家唔同，佢先係真係安仔，我只係金城安仔！」新劇中他與朱敏瀚需要扮女人，可擔心令觀眾反感？「有機會呀，因為喜感同感受好重要，觀眾未必接受太多，我哋拍攝時連我哋自己見到都反感，都無睇重播，拍攝時直頭合埋眼拍完就算，唔諗太多！」
周嘉洛擔正演出。
