請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

BTS休團成員各有各玩 V仔巴黎擁抱Eddie Redmayne Jin濟州罕晒背

BTS休團成員各有各玩,V仔巴黎擁抱Eddie Redmayne Jin濟州罕晒背。

超人氣韓團防彈少年團(BTS)於九周年大喜日子宣佈休團,成員將專注個人發展,但仍然會合作做綜藝,但要睇佢哋出Show就要等吓嘞。公佈消息後,成員都各自活動或享受假期,好鍾意睇藝術品及行博物館的隊長RM去咗歐遊,近日不斷上載歐遊相,見佢可以唔使戴口罩四圍去真係好羨慕。

而首個單飛的成員J-HOPE將於7月29日發行個人專輯《Jack In The Box》,今日正式在官網開始預購,專輯冇實體碟,會以Weverse Album形式發售,歌迷要先下載Weverse Albums APP再用Weverse賬號或SNS賬號登錄就可以聽歌,新碟相當抵聽,只售9.75美元(約77港幣)。而J-Hope會於7月1日率先發行專輯的主打歌,7月15日就可以聽晒全碟嘅歌。日前,J-HOPE現身Tom Sachs展覽,同場有大量韓星,包括G-DRAGON、朴敘俊、崔宇植、鄭有美、柳俊烈、SEVENTEEN JUN及TXT休寧凱等,當日J-HOPE玩得好開心。

昨日(26日),Jimin去咗睇老友河成雲嘅音樂劇,而JK就撐老友SEVENTEEN嘅尾場演唱會,有Fans直擊見到JK企足4個鐘睇Show,完場仲入後台影合照。而大哥JIN就喺濟洲享受假期,仲百年難得一見佢露上半身嘅背面,目的就係晒左腰嘅BTS友情紋身,因為激罕晒背,算係JIN入行後最性感演出,吸咗逾千二萬個Like,個個跪求睇正面,大哥珍當然唔會睬你哋。

最後隊中世帥V仔(金泰亨)同老友朴寶劍及BLACKPINK的Lisa,搭私人飛機去咗巴黎出席CELINE時裝Show,場地Palais de Tokyo周圍一早聚集大量Fans,Lisa及V一現身即引發震耳欲聾的尖叫聲,最後落車的朴寶劍都嚇親。穿著CELINE秋冬新裝亮相的3人,被全球媒體追訪,「TAEHYUNGxCELINE」、「LisaXCeline」等Hashtag火速佔據熱搜榜。

奧斯卡影帝Eddie Redmayne亦是Fashion Show座上客,完場後佢同V仔見面,兩人傾咗兩句,V仔主動攬攬Eddie,睇嚟V仔英語能力好咗好多喎。Eddie於於3位韓星引起的哄動感到震驚,「瘋狂、絕對是瘋狂。我意思是我有聽K-Pop,他們都很出色。我曾與韓國女星金秀賢合作,她有向我介紹韓流。」T

星島新聞集團慶回歸25周年專題網站,請即瀏覽

立即下載 | 全新《星島頭條》APP : https://bit.ly/3yLrgYZ