由人氣組合MIRROR首度全員上陣的電影《12怪盜》，於復活節假期正式上畫，結果票房大收，四日假期就大收$1,320萬（截止5/4已錄得$1,700萬），帶動全港票房收入上揚，連香港票房有限公司都發文報喜，指比去年的復活節同期上升了 22.27%，評語是︰「可見復活節檔期電影受到市民的歡迎，希望喜歡電影的市民，多到戲院睇戲！」
過往來說，票房與電影的質素會有一定關係，就算開頭開得差，口碑帶動下都可打場漂亮逆境波，剛剛農曆新年套《臨時劫案》就是一例。那麼《12怪盜》的票房又是否可反應該片的質素？你可以話電影口味見仁見智，但筆者親身體驗後，就覺得就算見仁見智，都總要有個底線，《12怪盜》就是一部劇情、人物描寫、動作場面、攝影效果都是屬於薄弱級別，說好看，只屬見仁，不見得有智。
那麼這$1,700萬是如何凝聚得來？就是靠見偶像的謝票場。有傳媒以票房數據指出，MIRROR在復活節4日長假，分成多個小隊四出謝票，結果所到的場次都爆滿，最高一日（1/4）更創下單日大收$400萬的票房紀錄，相當驚人。不過到翌日首個上班日，再冇謝票效應下，單日票房就急跌九成至$40萬，可謂見真章。
隨後MIRROR全員已出發到美加舉行個唱，未能再參與謝票下，票房要如何走下去呢？MakerVille就諗到一個方法，就算人唔喺度，都可以發功嘅方法。除咗買飛送角色收藏卡，仲待MIRROR回港後，立即舉行一場名為《12怪盜團魂見面會》的活動，限量280位，點先可以成為280分之1呢？就係要在4月4至14期間，入場睇一次《12怪盜》，憑票尾就可參加抽獎，真係人唔到都要禮到。
此舉又激發起一眾鏡粉去課金買飛，不過老老實實，套戲都已經睇過，係咪咁想再二刷三刷呢？如果只想換取一個抽獎機會，點樣先可以花最少金錢得到最多機會呢？終於被電影YouTuber鬼哥發現，但凡一些戲院提供朝早平價場，可以50蚊以下買到一張戲票的場次，都全數被掃光。而鬼哥心中存疑，到底大家係咪咁神心一早去睇戲呢？結果入到場，根本得寥寥幾多個人，成為全院滿座但唔見人嘅幽靈場或神功戲。說到底，醉翁之意不在酒，鏡粉搶得不是戲飛，你屆時播唔播套戲都唔緊要，最緊要係我取得多一個抽獎機會。一切都正在扭曲，令票房不再是一部電影的客觀標準。
同一時間，昨晚《填詞L》的導演黃綺琳，高興地向大家宣布，電影在上映一個月後，票房終於超越上一部作品《金都》的紀錄$526萬，亦總算為她與監製一起拿出那200萬的投資成本，過了第一條保險線，因為業界向以票房最少要是成本的三倍，才足以扣除所有開支達到收支平衡，黃導演還有約74萬元的路要行。你的50蚊可以買一個見偶像的機會，亦可拿來鼓勵一位導演不用蝕本，可以欣然創下一部作品，真正推動香港的創意工作，你又會點揀？
撰文︰余建
Facebook專頁︰https://www.facebook.com/Stupid.View
IG專頁︰https://www.instagram.com/Stupid.View