請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

有個閨密叫祖藍丨苑瓊丹做亞視遭冷待化妝師發爛 自封東北惡狗:我會咬人

苑瓊丹亮相王祖藍主持的節目《有個閨密叫祖藍》。

由王祖藍主持的綜藝節目《有個閨密叫祖藍》,本周日(4日)播出第六集邀請苑瓊丹做嘉賓,祖藍抵死表示與苑仔結緣,全因幫襯過對方公司的「育髮」及「防脫髮」療程。

與祖藍一碰頭就「把口冇停過」的苑仔,自封「東北惡狗」:「我會咬人,我份人落閘放狗,我最大問題係就算我想呃你,但我個樣(呃唔到人)……好多人都好驚我,我又好衰嘅,比較八卦,收收埋埋人哋好多黑材料。」每集都會帶嘉賓食好西的祖藍,先後帶苑仔到北京的四合院歎茶及品嚐海鮮邊爐,二人還接受製作組的「逆轉Truth or Dare」及「演技+觀察力測試」等任務,結果苑仔全線技術性擊倒祖藍,展示過人偵探頭腦,更連環爆料大談圈中見聞。

苑仔分享事業、愛情及婚姻方面的波折及得著,還有人生觀、愛情觀及與《男親女愛》同劇演員的深厚友情等。她指當初對演戲產生興趣,全因讀書時上過TVB新聞節目:「有次TVB去我學校拍計數機嘅故仔,攝影師拍拍吓走埋我度,咁我咪喺度扮計數囉,嗰晚返去睇新聞真係見到自己,我就覺得自己好似好識做戲咁。」

1982年因報讀亞洲電視第一期藝員訓練班入行,苑仔謂全靠在亞視打好基礎,才得以在TVB「生存」:「我喺亞視時會得罪啲高層,譬如有人誣蔑我,我會同高層解釋,就算佢話『唔聽呀,你出去啦』,我都會話『唔得!我一定要講。』人哋請你出去你都唔走、係都要講,其實好冇禮貌。我記得做完頭一個星期TVB,我揸架車去亞視度喊。」

苑仔續指在TVB工作初期「好多說話聽」:「有一次我梳頭,佢(工作人員)梳得有啲唔啱,我就話『咦?唔連戲喎』,梳頭嗰個嗰把梳就即刻啪喺張枱度話『咁你自己梳』,其實嗰吓要發脾氣好容易,要起身拍枱講粗口都得,但我當時諗咗諗決定吞咗佢。我拎起把梳,佢真係唔知我識梳,我咪自己吹自己梳,之後就起身走。」她透露當年在亞視化妝間亦曾多番受冷待,更試過坐足一小時冇人理,之後有化妝師點醒便走去學化妝轉做「不求人」:「從此以後冇人可以掂我個妝,冇眉毛又好、彩虹眼影又好、畫星星眼都好,全部我自己化。」

立即下載 | 全新《星島頭條》APP : https://bit.ly/3yLrgYZ