【湯水篇】清熱解渴-青紅蘿蔔馬碲豬骨湯
識飲識食
天氣咁熱其實都唔多入廚房煲湯，不過我家兩位老細都習慣左定時有湯飲，所以.我就冇得偷懶。(不過佢地鐘意我都係好樂意我唔怕辛苦，只怕佢地唔飲哈哈)！
突然好想飲青紅蘿蔔湯，依款湯我都成日煲，不過今次就轉左加馬蹄同粟米，可有清熱解渴作用，而且啖湯仲會甜啲呀~
紅蘿蔔含維他命A、B1、B2和C，更含大量胡蘿蔔素，能補血強身，滋潤解燥，驅胸鬱悶，調整腸胃，降火氣；青蘿蔔能清熱，有健胃化痰，滋潤助消化的功效；馬蹄能清熱解渴，涼血解毒，利尿通便，幫助消化，治療咽喉腫脹；粟米有助利尿、清熱、消暑及祛濕的功效；蜜棗潤肺止咳；南北杏可止咳下氣，潤燥消積。(網上資料)
紅蘿蔔1個、青蘿蔔1個、粟米1條、馬蹄10粒、蜜棗3粒、南北杏一湯匙 (少許)、豬骨$40~
紅蘿蔔及青蘿蔔去皮以滾筒式切塊~
馬蹄去皮~
粟米洗淨切段~
蜜棗及南北杏用清水浸15分鐘~
豬骨洗淨汆水~
煲內放約3L水，然後加入所有材料~
待滾起後，繼續用大火加蓋煲約15分鐘~
再轉慢火加蓋煲1.5小時~
最後加鹽調味就可以飲得~
今次改左用馬蹄同粟米嚟煲青紅蘿蔔湯，感覺都幾好，比我平日最多用嘅羅漢果有多一陣清甜味，清清地又幾啱夏天飲。最好就係又可以當餸食，咁晚餐仲可以慳返一個餸添.哈哈哈！
溫馨提示：
由於個別人仕體質不同，所以大家記得煲之前了解下自己，如有疑問，請先向註冊中醫查詢！
*本文章的內容若未經授權，不得轉載