Ray Online｜傳舉報江玉歡帶無穿商務衣飾訪客遊立會　吳秋北反駁：公開照片何需舉報？

立法會議員周不時都帶團參觀議會，不過最近就引發一場風波。事緣立法會議員江玉歡帶東歐詠春總會參觀立法會，訪客著住「中門大開」嘅詠春服飾。立法會主席梁君彥就發短訊，提醒議員同訪客需要著商務衣飾以保莊重。

江玉歡最近喺社交網站分享帶東歐詠春總會參觀立法會，話好開心可以同總會嘅麥樂弼大師同弟子，以及詠春羅賓師傅見面，仲多謝佢哋送嘅《葉問宗師》英文版。對於梁君彥嘅短訊內容，江玉歡回應傳媒查詢嗰陣話，覺得只係一件小事，佢話事前唔知道訪客嘅衣着，而詠春服裝亦有內搭。但佢強調理解梁君彥嘅意思，之後會提醒訪客著商務衣飾。

吳秋北澄清無舉報

有報道話綜合多個消息，包括工聯會會長吳秋北在內，有唔止1個議員向梁君彥投訴，令到「大主席」要發溫馨提示短訊。不過，吳秋北就喺社交網站發出嚴正聲明，澄清冇舉報任何人。佢又話明明係公開自爆嘅相片，使乜舉報？「如是配合自製假新聞轉移視線，便是沆瀣一氣，自甘墮落！」

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)