歌手麗英一直形象都是可愛開心，曲風亦以跳脫輕快為主。不過繼年初的〈美男子圖鑑〉後，新上架的歌曲〈解咒說明書〉就竟然賣慘情，原來歌曲靈感更來自她自己的感情經歷。
為了製作這首歌的MV，公司花費6位數字給團隊到日本拍攝。麗英表示今年更將會推出「愛情三部曲」：「第一首〈美男子圖鑑〉講對愛情嘅憧憬，喺花多眼亂嘅世界選擇自己鍾意嘅人；〈解咒說明書〉就係講緊受情傷嘅狀態，喺復原中嘅階段的情歌。另外，『愛情三部曲』歌名都有設計過，全部都係同書有關，大家可以期待一下！」
而麗英亦分享真實經歷：「我曾經喺一段關係裏面俾人嫌棄過，其中一個分手理由係嫌棄我著太多T恤牛仔褲，呢件事都令我非常傷心。後來，我發現一個人唔鍾意你，其實乜嘢都可以成為理由。我相信好多人都試過喺愛情上被人嫌棄，例如唔夠上進、身形唔靚之類，所以，我希望呢首歌可以安慰有相似經歷嘅人。任何人被嫌棄都會唔好受，我都經歷過自信心低落嘅時期，但之後明白到自己價值應該係由自己而定，最緊要係識得愛自己。」
而今次MV找來了〈全死角美少女戰士〉的導演Christopher再次合作，她說：「今次係我第一次喺日本拍MV，期待咗好耐，終於做到了，實在得來不易！因為我哋預算同時間都有限，計埋來回機程只係用咗3日時間，同埋要走12個景點，所以時間係非常緊湊。」導演Christopher安排了一個情節，講一個失戀女仔好努力做運動，借打拳幫助自己療傷。事後，導演才得悉原來麗英會打拳，麗英說：「因為去年開個人音樂會關係，我特登去學打拳，幫自己唱歌練氣，冇諗到拍MV派上用場，仲有機會見識到日本拳館。今次仲要多謝導演安排咗個靚仔日本教練陪我打拳，好彩之前打咗一年，連教練都讚我個直拳幾好。」
MV亦有幾場麗英傷心爆喊場面：「有一場戲我要喺隧道入面抱頭痛哭，隧道上面就有一條鐵路，我哋為咗令個畫面靚啲，所以特登睇時刻表去捕捉列車經過，但係同時要hold住傷感嘅情緒。好彩拍咗1 take導演就收貨，如果唔係，我哋要等多一個鐘先有另一架同款列車。」
留言 0