由視帝陳展鵬、視后林夏薇、馮盈盈等主演嘅無綫劇集《逆天奇案》去年成績理想，成為2021年最高收視劇集，監製劉家豪早喺去年慶功宴時已透露會開拍續集，近日佢終於喺社交網發文落實開拍消息：「《逆天2》創作已激情展開，並且確定原班人馬10月中開鏡，支持一下。」佢又標籤咗一班演員，當中包括陳展鵬、林夏薇、黃智賢、蔣祖曼，就連上集已慘死嘅張頴康及劉佩玥都有份，不過名單上卻冇咗「國民妖精」馮盈盈嘅名字，即引起網民揣測佢已被飛出劇組。
有網民表示希望新一輯唔會再有「小三」情節，監製回應指：「劇組會努力做好」，另有網友指：「非常期待，更加希望Wing姐（林夏薇）和森Sir（陳展鵬）復合」，監製就漏口風：「9成會的！」
東網網站 : https://on.cc/東網Facebook專頁 : https://www.facebook.com/onccnews/
