啱啱過咗去嘅星期六播出嘅《3日2夜》繼續係兩位又靚，人氣又高嘅朱千雪（Tracy）和湯洛雯（Roxanne）帶大家遊北海道。
喺《3日2夜》入面，我哋最常見到嘅就係朱千雪同湯洛雯互串大家。佢哋感情超好，湯洛雯不斷搞爛gag，而朱千雪嘅精警對答令人會心微笑。唔止啊，仲有佢哋非常抵死嘅「爆肚」對話，睇到真係忍唔住笑。
例如湯洛雯好粗魯咁將蜜瓜包塞入朱千雪個口入面，佢自知唔溫柔，就先開口話：「我唔係好慣餵人食嘢～」朱千雪都唔輸蝕、搞笑反擊咁話：「唔怪得你冇拖拍啦（單身）！」激到湯洛雯「扭計」嗌唔拍：「導演我唔拍啦，我走啦！佢成日攻擊我弱點。走開啦，嬲吖。」
朱千雪見狀即刻氹番湯洛雯，餵佢食密瓜：「唔好嬲啦。」湯洛雯先話：「我係因為啲密瓜（先唔嬲）。」
佢哋一齊參選2012年香港小姐而認識，並培養出深厚嘅感情。兩位同樣係當年嘅大熱，依家都係大家公認嘅女神！睇住佢哋兩個互窒，不但冇潑婦罵街嘅味道，網民仲話睇得好舒服～
閨蜜就應該係咁：中意互窒大家，但知道對方嘅底線，絕對唔會玩出火！感情不減反增啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0