【型！】歐陽巧瑩婚前壓力爆煲 林師傑體貼拆彈：兩個人一條命

林師傑和歐陽巧瑩（Tammy）拍拖4年決定結婚，將於11月22日拉埋天窗，目前忙於籌備婚禮，準人妻Tammy自爆上星期情緒爆煲，因為佢平日少同屋企人傾深入嘢，當傾到煽情話題時，自己好似喪屍咁爆喊尖叫，好在得林師傑陪伴支持，幫佢解決了問題，發覺彼此唔可以冇咗對方。

問到Tammy係咪患咗婚前恐懼症？佢回覆傳媒表示：「我唔係婚前恐懼呀！呢個係一直都有嘅問題，只係冇去面對，人生梗有一啲自己未夠膽面對嘅問題，又唔關婚唔婚前事，純粹呢段時間有好多嘢搞，所以呢件事被林師傑發現到，強迫地令我對自己坦白、對佢坦白、對屋企人坦白，解決咗都好，解開心結嘛！」

木偶哥則體貼地表示：「其實呢個關乎成長，家家都有本難唸的經，最主要透過搞結婚呢件事，我做咗佢哋一家人溝通嘅橋樑，依家我享受緊做一個仔、哥、細佬、丈夫，點樣喺舒服底下保障到自己屋企之餘，亦令到佢屋企舒服。」

能夠幫未婚妻解決同家人嘅問題，木偶哥覺得好開心，大晒幸福話佢哋兩個人活緊一條命：「依家自己好有成功感，亦見到Tammy對我越嚟越有信心，係覺得正嘅，覺得好似天跌落嚟可以當被冚，冇乜大壓力，兩個人係活緊一條命，所有嘢係冇問題，係搞得掂！」

木偶哥仲多謝一班圈中好友幫手，兄弟團包括羅天宇、楊潮凱、周志康、麥秋成、張明偉、翟威廉、譚俊彥，而溫家偉、麥美恩、劉佩玥、蔚雨芯、陳婉衡、王子涵、朱晨麗做姐妹團，伴郎係木偶哥圈外老死Samuel，伴娘係Tam妹妹Bubu。

精選娛聞，喺晒《娛果》
http://fb.com/appledailyent