「港女野人」歷盡艱辛！廖慧儀無遮擋解手　何泳芍聞補Shot嚎哭

藝人何泳芍（Honey）、廖慧儀（Jessica）、胡美貽（Nicole）及陳若思（Amber）在播畢的無綫真人騷《港女野人奇異記》中不時性感示人，遊山玩水。但拍攝背後有苦自己知，Honey自爆拍到情緒崩潰，大壓力到發噩夢痛哭。

4位「港女野人」日前接受專訪，分享拍攝《奇異記》的難忘片段，Honey想起在沙漠紮營過夜的經歷，透露當時風力猶如8號風球：「嗰晚溫度應該係零下，煲熱水要半個鐘，我哋4個要用身體壓住個營先可以瞓覺，因為大風大雨到個帳篷隨時畀風吹走，啲背囊全部濕晒。」她更自爆拍到情緒崩潰，喊聲令工作人員以為「夜半鬼敲門」，但她的爆喊原因卻相當搞笑：「發夢夢到返到香港，但導演打畀我話要返新西蘭補拍，我瞓醒時仲有兩行眼淚。（辛苦到喊？）係好大壓力囉，返香港時喺度諗我哋可以齊齊整整搭回程機係好感恩。」

陳若思廁格臭到暈

至於Jessica最深刻的是在荒山野嶺人有三急時，要在無遮無掩下用膠袋解決，Honey即和應指試過在懸崖邊「方便」時，很怕會驚碌落山。Amber繼稱就算有廁所也未必敢去，因她曾誤闖入「千年臭廁」，她說謂：「因為好急，第一個衝入去一個男女同用、冇燈、長期冇人清潔嘅『常滿』廁格度，閉氣都聞到好臭，去完暈暈哋，之後冇人敢入去。」Jessica更形容臭味遠至800米以外也聞到。

東網網站 : https://on.cc/東網Facebook專頁 : https://www.facebook.com/onccnews/