MIRROR演唱會於兩星期前發生嚴重意外，擊中兩名舞蹈員，當中李啟言（阿Mo）情況曾一度危殆，雖然日前清醒過來，但仍在深切治療部留醫。MIRROR成員至今仍全面停工，姜濤與Jer亦缺席日前的《阿媽有咗第二個》首映。據知ERROR成員梁業（肥仔）、吳保錡（保錡）、何啟華（阿Dee）及郭嘉駿（193）的工作亦近乎停擺，而ERROR四子主持的《尾二一屆口罩小姐》將於下星期一（8月15日）播出。
不少網民都希望MIRROR和ERROR成員發聲，當中出名敢言的郭嘉駿（193）日前就因為有網民私訊向他開火，大罵他「唔係好敢言嘅咩，做咩唔出嚟話下你公司啊」，引得193親自回應。
有網民昨日（8月11日）在社交平台某關注組貼出與193的私訊對話截圖。該名網民一開始就以「廢柴」稱呼193，寫道：「喂廢柴，你唔係好敢言架（㗎）咩？做咩唔出嚟話下你公司呀？你老X生到你牛高馬大剩係識恰啲幾十歲同𡃁妹，X下你老細呀嗎﹗唔敢呀？抵你咁乞人憎。」
一向敢言的193留言反問：「你係咪精神有問題，你覺得我係時事評論員？我咩都要評論嘅咩？我鍾意講乜就講乜架啦使唔使你批准﹗」、「講你係垃圾囉，真人咪又係一條廢柴，知你有幾X廢未呀？我覺得抵唔抵X，關你X事咩，我想講就自然會講。」該網友之後直言會post畀傳媒，193回應道：「你咪post囉」，隨後封鎖該網民並留言「post完記住send番條link俾我」。
