譚耀宗：美國制裁只會害咗被告 或令國安案移交內地審訊

【獨媒報導】美國國會跨黨派議員提案，要求制裁49名香港官員及法官等。全國港澳研究會副會長、前全國人大常委譚耀宗指如法案獲通過，肯定對本港法官及檢控官構成壓力，港府在別無選擇下，被迫啟動《香港國安法》第55條，將相關案件移交內地審訊。譚耀宗更提醒：「（美國制裁）以為咁可以幫到某一個人、某個案呀，可以維護呢啲觸犯咗國家安全罪呢啲人呀？幫佢唔到呀！你可能害咗佢，累咗佢呀！」

全國港澳研究會顧問劉兆佳、行政會議召集人葉劉淑儀先後表示，如令香港難以對重大國安案件作正常審判，不排除逼使中央出手，啟動《香港國安法》第55條，將相關案件交至內地處理。

譚耀宗指《香港國安法》條文全面：有需要嘅時候就啟動

譚耀宗今早接受商台節目《在晴朗的一天出發》訪問，主持問到，如今「發生事」便動用第55條，會否予人兒戲的感覺。譚耀宗稱絕對不會，指反而證明立法全面、細節，並留了「保險掣」，即在遇到特殊情況下，即特區政府無法有效執行國安法，或涉及外國或者境外勢力介入，便可啟動該條條文：「我哋立法嘅時候都留咗個好制度，有必要、有需要嘅時候就啟動。」

對於制裁法案仍屬初步階段，譚耀宗認為必須防範於未然：「我們先提出問題先，警告咗佢哋。喂！你咪亂嚟呀，以為咁可以幫到某一個人、某個案呀，可以維護呢啲觸犯咗國家安全罪呢啲人呀？幫佢唔到呀！你可能害咗佢，累咗佢呀！」

斥美國議員「靠惡」針對法官 譚耀宗：咩事呀呢個世界

在任全國人大常委期間，譚耀宗亦遭到美國制裁。他斥責今次提出法案的美國議員，「有時佢做嘢都係亂嚟」：「而且佢就靠惡，話我好巴閉㗎，可以分分鐘用呢個禁制嘅措施，可以打壓你，恐嚇你！」他認為，美國最離譜的是針對法官、檢控人員：「都要牽涉埋喎，都制裁喎。嘩！咩事呀呢個世界！如果你美國咁樣都得，全世界任何國家你都可以⋯⋯太離譜啦！」

譚耀宗指如美國落實制裁，即標誌着外國勢力介入本港的國安法重大案件，特區政府可檢視是否無法有效執行《香港國安法》，即考慮啟動第55條。他解釋指，司法人員在處理案件受到重大威脅，便要啟動第55條：「宜家係個人制裁喎！唔係淨係針對特區政府。個人喎，49個名單喎！俾壓力我哋呢啲人喎！如果俾壓力我哋呢啲人，個審判咪受到影響囉，受到影響，我哋無理由由佢㗎嘛！」

移交內地審訊 譚耀宗：無話講差唔差啲

被問到動用《香港國安法》第55條對美國的作用，譚耀宗認為可「提醒」對方：「嘩，未審之前你就喺度恐嚇，係咪？咁呢個仲成世界嘅！我哋嘅司法仲獨立嘅？我哋嘅法治咪受你管控？」

至於案件移交內地審議，有聲音指將會「差啲」，譚耀宗則指「無話講差唔差啲」，強調會按程序由指定部門負責，並由檢察院起訴、法院判決，「未審嘅時候我哋唔知有咩唔同」。