MIRROR演唱會精彩落幕　跳唱整齊有型能量爆燈　令人目不瑕給！

（本文獲原創者授權轉載。文章題目由LINE TODAY編輯所擬。）

《MIRROR FEEL THE PASSION CONCERT TOUR 2024 · HONG KONG》

一共16場既Mirror演唱會喺上星期完滿結束，一如所料地豐富精彩，喺歡呼聲中為觀眾帶嚟難忘一夜。
（我睇2/2尾二場）

「Wake up 快跳進 這壯闊宇宙 Get up 最暗處 載滿了星斗」

開場介紹影片已經充滿霸氣，讓隊員們華麗登場，緊接幾首團歌火速炒熱氣氛。及後到小組同個人表演，快歌、抒情歌一首接一首，編排非常充實，毫無冷場。後段十二子再次合體，用音樂為大家送上一段回憶之旅，畫上不捨句號。

Mirror今次live表現可以話係打破質疑，非常亮眼，團歌跳唱整齊有型，唱功穩定有力，台上能量爆燈，令人目不瑕給，每個成員都有表現自己既機會。睇得出佢地今次有備以來，盡心盡力將最好既表演帶比觀眾。

「苦到最盡 也總有你 苦有你 願意一世一起」

全晚驚喜滿滿，當中有幾個環節我特別喜歡。首先係四人Band，Tiger新作《Alright》喺結他、鼓，仲有隊友和唱下比CD版更有力量；到Stanley同Jer演繹《說再見了吧》，以成熟聲線唱出濃厚男人味。

而AK《Blue Monkey》同lan《夜視鏡》，兩首作品我都係第一次睇live，型格跳唱配上dancer同舞台效果，散發滿滿魅力。值得一提係Jeremy live一下子就吸引到我，實在太charm了。

「愛沒盡頭不必害怕 我會自強不需記掛」

驚喜以外仲有唔少催淚位。好似《來不及》抒發Stanley對媽媽既思念；《We All Are》唱出Mirror一路走嚟既辛酸，治癒內心；《One and All》觀眾大合唱更加係我睇過咁多演唱會中最感動。

整個演唱會絕對稱得上出色，相信一班fans包括我都相當滿意。美中不足係有唔少作品都無表演到，同埋私心想再多啲團歌，最想聽到當然係萬眾期待既《Warrior》。

「隨時日走得太快 昨天的小子 突然成熟了」

轉眼間Mirror已經出道五年，由當初一心追尋夢想既參賽者，今日已經成為萬人追棒既偶像。作為由《全民造星》首播追看既觀眾，感覺非常神奇。起初我只係當綜藝嚟睇，甚至Mirror出道時都唔太睇好，畢竟我成長喺一個無偶像，只有歌手既年代，但慢慢比佢地各種作品吸引，睇完依個演唱會，更加可以講一句「我喜歡Mirror」。

「時鐘滴答 秒針走過 時光匆匆 我即使挫敗過 請信任我」

不過「欲帶皇冠，必承其重」，正因Mirror達到一個近年前所未有既高度，自然會有唔少hater作出各種批評、攻擊，甚至「鏡粉」都彷彿成為一個負面標籤。雖然無奈亦唔好受，但依個係作為偶像必須承受既一環。希望佢地可以將負面評價化為動力，繼續力求完美，相信終有一日會得到更多人認同。

「沿途高低伴我走過 難得是你跟我」

作為廣東歌樂迷，能夠見證Mirror成長，再浩浩蕩蕩地創造自己既世紀其實好幸福。近年香港樂壇能再次興旺，佢地功不可沒，成功開創先河，帶嚟一大班新聽眾。當然佢地尚有唔少進步空間，但無可否認就係有種吸引力，令一班粉絲不離不棄。

未來Mirror何去何從無人知道，作為樂迷只可珍惜每次齊人既機會。個人當然非常希望佢地可以團結地走下去，繼續帶嚟歡樂，陪伴大家走過高低起跌。

「We are one and all 從不只我一個」

作者：hkpopculturelover
▼Follow hkpopculturelover
Instagram: https://www.instagram.com/hkpopculturelover/

【想在LINE TODAY刊登你的文章或影片，歡迎聯絡我們】