去年4月，賭王三房千金何超蓮承認跟內地男星竇驍拍拖，熱戀期特別甜，超蓮經常喺社交平台晒恩愛，「竇蓮戀」被睇好。
上月，竇驍以何家「準女婿」身分陪超蓮出席賭王喪禮，留港至今都一直住喺三太的豪宅同超蓮同居，可以日見夜見女友，又有健身室可用，生活咁寫意難怪仲未願返內地開工。尋晚，超蓮上載短片到抖音，片段男女主角分別係竇驍同超蓮，男方話要教女方玩遊戲，叫佢彎身再將手伸向後面，因為動作太奇怪，超蓮做咗一陣就唔肯做，仲撒嬌推男友質疑被呃，但之後都配合男友跟住做，原來男方同女方玩甜蜜反手抱，電光火石間，男方一捉住女方雙手向上一拉，女方就反轉咗個人然後直撲男友懷中，熊抱加雙腳夾實竇驍嘅超蓮笑到癲，而男方為怕女友跌，即用手包實女方Pat Pat，臨尾更突然用咀啄咗女友塊面一吓，成串動作勁有中學生拍拖初戀Feel，好甜好閃，盲嘞喂。
