4月賞花季節就到，有冇諗過喺日本除咗賞櫻花之外，仲可以欣賞到滿山藍色粉蝶花？距離東京市區2小時車程的茨城國營日立海濱公園（国営ひたち海浜公園），裡面嘅「見晴之丘」於每年4月初就開始布滿藍色花海，同場仲有鬱金香、水仙花同油菜花加映，真係打卡必選。
呢啲咁可愛嘅藍色小花名為喜林草，俗稱粉蝶花，佢仲有個英文名字叫Baby blue eyes，即「嬰兒藍色的眼睛」，十分貼切。粉蝶花嘅花語有「喜愛森林」、「感恩」嘅意思。
日立海濱公園位於茨城縣，從東京岀發約兩小時就可以到達。公園面積約200公頃，即約有10個維園咁大。主要分花園區、樹林區及遊樂園區。隨著一年四季有唔同變化，公園會展示不同類型盛開嘅花卉。好似有春天嘅藍粉蝶花，夏天嘅向日葵，秋天紅色掃帚草，仲有冬天嘅梅花。只要適逢花卉盛開，一年去幾次都唔會覺得膩。安排行程之前，可以到官網睇下花卉開花情況，咁就萬無一失。
- 由東京岀發直達日立海濱公園入口，可以選擇坐高速巴士，車程約兩小時，不過班次較疏落，岀發前可以到官網留意詳情。高速巴士官網
- 想彈性啲可以選擇坐JR特急列車到「勝田」站，下車後往東口岀口，然後喺2號巴士站坐巴士到海濱公園西口落車。
- 公園提供約4,350個停車泊位。自駕到公園就離北關東高速公路 「常陸海濱公園IC」出口約0.9km。上次我地適逢睇粉蝶花旺季，等候入公園泊車約一小時，唔想等又唔介意行多少少可以選擇泊附近購物商場嘅停車場。
喺見晴之丘（みはらしの丘）睇完約450萬株粉蝶花後，就可以稍移腳步到另一個花園區睇鬱金香。顏色七彩繽紛嘅鬱金香襯托著木製風車，感覺有如置身「庫肯霍夫」（Keukenhof）——荷蘭最著名鬱金香園一樣。
日立海濱公園好適合一家大細假日遊玩，靜態的可以到植物園走走，動態的又可以在遊戲區玩小型遊戲。
呢度仲有好多打扮得靚靚嘅寵物，同佢地嘅主人一齊留倩影。注意公園開放時間係早上9時30分至下午5時，撞正花季又唔想同人迫住影相就要早少少到。
日立海濱公園更被CNN評選為世界十大浪漫花海之一，無論影人或動物，有個咁靚嘅花海作背景，成個構圖簡直冇得輸。
公園裡設有好多小食攤位，其中限定嘅波子氣水味雪糕一定要試下，十分配合季節限定嘅粉蝶花。
想挑戰下可以試埋粉蝶花咖哩，聽聞味道冇想像中咁差，店內更岀售咖哩調味包作手信。
上年4月15日係我地參加第五個海外馬拉松（霞之浦馬拉松）順路去海濱公園旅遊，根據過往開花紀錄大概會係4月尾，由於天氣和暖，花期早咗一星期開滿，有幸睇到咁靚嘅花田，正如花語「感恩」一樣，要感恩所遇到的。
日立海濱公園
地址：茨城縣日立那珂市大字馬渡大沼605-4
門票：大人450日元（約32港元），65歲以上長者210日元（約15港元），中學生以下免費
開放時間：3月1日至7月20日 上午9時30分至下午5時
7月21日至8月31日 上午9時30分至下午6時
9月1日至10月31日 上午9時30分至下午5時
11月1日至2月底 上午9時30分至下午4時30分
網址：https://en.hitachikaihin.jp/ct.html
茨城縣基本資料
地理位置：位於日本關東地方北部
時區：比香港快1小時
簽證：持有香港特區護照可免簽證
官方語言：日文
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
