無綫劇《福爾摩師奶》今個星期開播，除了是陳松伶繼《全職沒女》後再次回歸，其實亦是布偉傑暫別TVB之作！布偉傑效力TVB 17年，近年為劇集中的「御用鬼佬」，不過佢在去年已經正式與公司結束合約，現時更已接拍了兩部電影，進軍荷李活發展！
撰文：新假期｜圖片：新傳媒、Instagram、劇照
《福爾摩師奶》布偉傑暫別作
無綫新劇《福爾摩師奶》今個星期開播，「松松姐姐」陳松伶繼2017年《全職沒女》後再次回歸，今次飾演爵士夫人祖迪費查，而佢嗰位英國爵士老公菲臘費查，當然就由TVB「御用鬼佬」布偉傑飾演！
去年離開TVB
不過唔講你未必知，其實布偉傑去年已跟TVB結束17年賓主關係，《福爾摩師奶》及之前的《荷里活有個大老千》都會是其暫別作品。咁唔知TVB之後搵邊個演外國人角色呢？
進軍荷李活拍戲
離開TVB後，布偉傑在化妝師太太Celia介紹下，認識到電影公司華誼兄弟的人員。後來又在兩位美國朋友介紹下，接拍兩部電影，兩部電影據知分別會在尼泊爾及杜拜拍攝，進軍荷李活！
大學修讀中國文學 精通三文四語
現年46歲的布偉傑本名Brian Thomas Burrell，生於美國猶他州鹽湖城，大學期間修讀中國文學及亞洲研究，精通廣東話、普通話、英語及柬埔寨語。布偉傑1995年來港時曾任幼稚園英語老師，之後在2001年開始參演TVB劇集。
接河國榮棒成「御用鬼佬」
有著先天優勢，布偉傑在河國榮2007年離巢後，接棒成為另一位「御用鬼佬」，幾乎包辦所有戲份比較多的外國人角色；另外亦有參演廣告及司儀工作。
組樂隊開音樂會
布偉傑演戲外同樣熱愛音樂，與幾位志同道合的音樂人組成樂隊「港三港四」，今年1月更在朋友借出的場地舉行音樂會，在零收入、低成本下以歌會友！
爆新劇改名《福爾摩師奶》因由 傳遷就內地市場而改？！
上星期六《荷里活有個大老千》播出大結局，緊接播出由陳松伶、陳煒及黃智賢主演嘅《福爾摩師奶》，雖然呢套新劇似乎有吸引觀眾嘅地方，但同時亦有人話新劇個名好鬼娘，仲有傳係想貼近內地市場而改呢個名！究竟實情係點？
今次劇集以陳松伶、陳煒及黃智賢三位領軍，講述首位華人爵士夫人祖迪費查（陳松伶飾），因洋人老公失勢兼失蹤，落難到品流複雜嘅油麻地，不幸捲入連環妓女殺手「開膛手傑克」案件中，更被指為疑兇而展開嘅一個故事！
追看3大原因：
｜題材有追看性
今次《福》以懸疑推理為主題，過往TVB出產嘅推理劇都係收視嘅保證，例如：《法證先鋒》系列、《鑑證實錄》系列等。
加上，劇集未出街前，監製方駿釗更豪言：「包保觀眾估唔到！」，相信劇中唔少細節都會有所關連，唔少觀眾都應該會睇得投入之餘，仲會想不斷追看！
｜王牌監製加持
《福》嘅監製方駿釗正係近年幾套劇集嘅收視保證，方駿釗對上嘅3套作品：、《一屋老友記》、《降魔的》及《跳躍生命線》收視及口碑都唔錯，而《跳》更於上年榮獲最佳劇集一獎，可見劇集品質應有保證。
｜全tvb自家製作
近年，TVB都播出唔少中港合拍劇及內地劇，如《延禧攻略》、《守護神之保險調查》等。要睇到一套百分百喺自家製嘅電視劇好似難上加難，但好在之前播出嘅《大帥哥》就自家製得嚟亦冇令觀眾失望。
而今次呢套《福》同樣嚟自TVB親自出品，雖然未知有冇品質保證，不過以自家劇嚟講都叫係令人有所期待嘅，不竟有陳松伶、黃智賢和陳煒等好戲之人坐陣！
劇名娘味濃
雖然有部分網友指《福爾摩師奶》呢個名聽落怪怪地，似乎唔太切合本地觀眾嘅口味，仲有傳聞指呢個劇名係為咗遷就內地市場而改！
原來《福爾摩師奶》開戲時劇名係叫《危城First Lady》，而監製更否認傳聞所指，表示改名只係想加強喜劇感，想知套劇夠唔夠喜感，大家就一於今晚睇睇啦！
留言 0