克羅地亞教練達歷: 我覺得國際足協對克羅地亞缺乏尊重 除咗摩迪, 其他克羅地亞球員無份入選候選名單

克羅地亞國家隊🇭🇷教練達歷接受訪問就話「我對於國際足協對克羅地亞嘅態度而覺得失望，基於球隊得到所有成就，我哋應該得到更多尊重。我哋係唯一一隊卡塔爾世界盃同今季歐洲國家聯賽殺入四強嘅國家隊。而且我哋仲係2022年世界盃成功擊敗巴西🇧🇷，我哋同法國🇫🇷更加係唯一兩隊最近兩屆世界盃拎到獎牌嘅球隊🙃。」

達歷表示「大家睇吓國際足協年度最佳球員14人候選名單，除咗偉大嘅摩迪，仲有冇其他克羅地亞球員？我唔想提其他候選球員，因為我好尊重每位被提名嘅球員同教練🥲。」

達歷仲話「點解中場高華錫無份入選？高華錫贏咗上年世界冠軍球會盃仲要踢咗一屆精彩世界盃。咁中堅加維度個名又去咗邊？話晒好多傳媒都將佢列入世界盃同德甲最佳11人。而利華高域踢完世界盃之後唔係都應該可以入選最佳龍門候選名單🤔？」

達歷最後就話「我覺得國際足協對於克羅地亞🇭🇷缺乏尊重，考慮到以上所有因素，我決定唔參加今年國際足協年度最佳球員投票，但我想恭喜所有得獎朋友，尤其係摩迪，摩迪對我嚟講永遠都係第一😎。」

▼ Follow Football.jai 足球仔
Facebook: https://www.facebook.com/football.jai
Instagram: https://www.instagram.com/football.jai/