柳應廷張天賦音樂會｜第二場改歌單頻送驚喜　兩度encore答謝粉絲

《KATCH OUR LIFE Jer柳應廷 x MC張天賦 音樂會》一連兩晚上演，昨晚（31號）舉行尾場演出，Jer柳應廷及MC張天賦與觀眾台上台下打成一片，二人在尾場改動歌單給大家驚喜，又在音樂會尾聲更特別來個真encore，掀起全晚高潮。

音樂會一開始，Jer與MC忘我演繹〈救命稻草〉、〈約齊靈魂在墳墓開生日派對〉、〈記憶棉〉及〈風靈物語〉等多首高難度作品後，才跟台下觀眾打招呼。來到尾場，二人都顯得有點依依不捨，MC說：「好多謝大家嚟睇我哋嘅演唱會，今日係最後一場喇，希望我同Jer唔留力之餘，大家都唔好留力，唔好吝嗇你哋嘅掌聲同歡呼聲。」

Jer事先張揚當晚演出細節：「大家有福喇！因為今（昨）晚嘅rundown係唔同嘅，頭場比較多MC嘅歌，今日就比較多我嘅歌。我都好期待MC唱我嘅歌。」接著二人便合唱了昨晚限定、Jer的〈坐看雲起時〉，為粉絲們送上第一份驚喜。

今次音樂會特別設計了主舞台及副舞台，在音樂會中段，Jer與MC都會走到副舞台的籠裡演繹〈狂人日記〉、〈小心地滑〉、〈半〉及〈下流社會〉，靠近副舞台的觀眾可以近距離看到二人鬥妖，自然尖叫聲不斷，不過唱完這一part後，Jer與MC要以極速跑回主舞台繼續演出，以免形響音樂會節奏與氣氛，結果在後台便上演了兩位「選手」拔足狂奔的場面，MC笑言二人就像在進行短跑比賽一樣。

鬥妖之後，Jer與MC特別設計了以RnB歌曲貫穿的一part，他們亦透露了對RnB的喜愛，Jer道：「我自己歌單入面係冇RnB嘅歌，但今次合作完就想做返隻。其實我揀Jay Fung嘅歌，都係我好鍾意嘅，而由細到大，我都鍾意聽方大同。」MC表示自己也是粉絲，更說：「記得我啱啱去到外國，未有朋友仲係宅男嘅時候，俾我喺網上意外地發現方大同嘅歌，跟住我就好鍾意佢喇，而跟住呢首就係我嘅入坑歌。」MC與Jer也就即時為粉絲們送上第二份驚喜、他們都極度鍾情的方大同〈愛愛愛〉。

另外，在音樂會尾聲encore之時，Jer與MC再次走到副舞台唱出〈世一〉及昨晚限定的〈大海少年〉，二人更落台走近觀眾席與粉絲們作零距離接觸，握手自拍派心有求必應，粉絲們自然興奮至極，而音樂會完結之時，因為觀眾encore聲不斷，一直未肯離去，Jer與MC都備受感動，於是再次登場，送上終極大驚喜，但Jer說：「其實見你哋唔走，所以諗住上嚟搞下笑咋！」粉絲們當然不罷休，結果再三起哄下，二人演繹過〈老派約會之必要〉及〈反對無效〉後，音樂會才告終，粉絲們也盡興而歸。