《反起跑線聯盟》第一集我已經好喜歡，勢估唔到續集更上一層樓，讓觀眾再次陪伴依班細路同家長成長。
「伴我跑伴我追 天真的臉 期望再能共你 天天相見」
劇集主線圍繞小朋友們初入小學所面對嘅挑戰同轉變，劇情豐富溫馨，節奏輕鬆歡樂，有笑有淚。
校園生活以外，今集花咗更多篇幅講父母自身。雖然佢地已經係大人，但只係第一次養育小朋友，每個經歷佢地都並無經驗，需要硬住頭皮去面對，再從中學習，有無數辛苦難捱嘅時間，難以安枕。
再者，佢地亦係人地嘅仔女，成長路上同樣會有心結甚至傷口，影響深遠。即使生兒育女後，依然需要時間同彼此諒解先能夠療癒。畢竟童年對一個人嘅影響實在太大，佢能夠療癒你日後一切傷口，亦可以成為一世嘅陰影，相信勾起到唔少觀眾共鳴。
「我歡樂 我歡笑 我最愛是這校園 悠悠高歌 悠悠起舞 我最愛是這家」
劇集喺愉快溫暖中帶出唔少反思。究竟點樣先係對仔女最好？係要嬴在起跑線？定提供一個開心放鬆嘅學習環境？只可以話每個人都係獨立個體，世界無一條適合所有人嘅成功公式，當中亦有太大控制唔到嘅因素。
個人而言，身邊童年過得愉快，有父母足夠同用心陪伴嘅親戚朋友，長大後好似各方面都唔會太差。
「沒壓抑沒困擾 不需考驗 唯獨有情共愛 在引牽」
戲中大人小朋友性格塑造分明。新加入嘅冼老師當然係最大亮點，由起初嚴厲得令人討厭，其實內心充滿愛，更逐漸比依班小朋友打動而改變，最後同學生們離別一幕令人動容。其他父母就夾慣夾熟，好有火花，同角色融為一體。
小演員們亦個個出色，鬼馬搞笑，天真純情，實在太可愛，見到佢地圍埋一齊已經好開心。我私心最喜歡Billy仔，佢外表真係勁得意，戲中窩心乖巧嘅性格仲非常討喜，個幾場喊戲睇到我心都酸埋。
「讓我抓著記憶 好好思念 懷念你懷念我 情未變」
作為觀眾能夠見證依個大家庭戲內戲外成長，係有種難以言喻嘅感動，依三個星期每晚都睇得好開心！
睇完依套劇之後，不妨試下對父母同仔女展現多一份愛同關心，幸福快樂其實無想像中咁困難💞
第三季！第三季！
▼Follow hkpopculturelover
Instagram: https://www.instagram.com/hkpopculturelover/
留言 0