娛圈千億駙馬睇心態 伍富橋收波子勁風騷 袁偉豪唔甘心顯得衰老

1. 圈中唔少豪門駙馬，近年最為網民關注嘅當然係億萬駙馬伍富橋 。早前伍富橋30歲生日，老婆Shirley大費周章為佢慶祝，除咗請嚟圈內外好友，重頭戲當然係禮物環節！太太豪爽勁送多份禮物，包括價值五位數KobeBryant 簽名籃球，仲有生日日期車牌。Shirley仲親手換埋上車，順便曬下部百萬波子愛駒，閃死隔離！

2. 網民自伍富橋同太太拍拖，已表示唔睇好。直至今次30歲生日party，有網民就轉口風「佢哋真係真愛喎」，「醒目過Steven，泊個好碼頭好重要」。當年伍富橋「忍辱負重」，背負住「軟飯王」名銜，2022年與家族身家以億計算嘅富貴太太Shirley結婚，婚後二人即住西貢相思灣5000呎豪宅。結婚兩年，伍富橋懶理酸民，相當享受億萬駙馬名銜，過得寫意又快活。

3. 同樣出身大台嘅袁偉豪 ，喺2020年同細自己十年港姐張寶兒 結婚，亦因張家底厚而被外界標籤「豪門駙馬」。袁偉豪當年直認好介意呢個稱號，因而多次同網民罵戰。

4. 屋邨出身的袁偉豪一直受TVB力捧，今不過年43歲嘅佢喺最新劇集中，被形容樣貌「斷崖式衰老」。佢都嘗試解釋，話同期拍緊3部劇，加上又要照顧個仔，「所以眼袋大咗啲，身體真係冇以前咁好！」仲好豁達咁話「就算被人話斷崖式或火箭式衰老都好，都希望80歲時仍在工作。」

5. 相信都唔係好多人強調想80歲仲要工作！自力更生嘅袁偉豪，當年曾經講一句「我欠咗你哋班傳媒？」被網民狠批EQ不夠高，雖然近年情緒變溫和，但樣子常屈屈不歡。其實豪門駙馬都係虛銜嚟嘅啫，無謂太認真！

6. 另一人辦黎諾懿 ，同樣被封為「5億駙馬」，但就情商極高，結婚後積極發展自己事業，近年仲撈過界由演員到監製，啲節目算幾收得。舊年佢仲加盟做埋飲食集團創意官，力證唔駛靠老婆都可以發圍，殺出另一條路！

▼Follow 娛頭
Facebook: https://www.facebook.com/profile.php?id=61554772610166