藝人拍戲經常都會飾演唔同行業嘅人士，而唔少人喺入行之前都曾經做過其他職業，唔知對佢哋揣摩戲入面嘅角色有無幫助呢？
王喜
近來甚少喺電視螢幕上出現嘅王喜，最為人熟悉嘅作品一定係由佢擔任主演嘅《烈火雄心》系列，佢飾演消防員真係入型入格！
原來佢入行之前曾經做過救生員，之後1986年就加入咗皇家香港警察隊，任職期間佢喺一次事件中從火海救出一名警長、一名警校啱啱畢業嘅女警同一名仲未畢業嘅男學警，救人事跡更列入香港警隊十大英雄事件，好犀利啊！
唔知係咪因為呢個原因，所以佢喺《烈火雄心》入面嘅演出特別出色！
胡定欣
兩屆視后胡定欣喺中學畢業之後做過秘書，後來參加1999年嘅《全球華人新秀歌唱大賽》，仲入到最後四強！2001就加入無綫電視藝員訓練班，成為第18期藝員訓練生入行。
胡定欣入行至今十幾年，出演過好多套電視劇，其中喺《皆大歡喜》入面都有飾演過秘書嘅角色，不過只屬過場，未有發揮演技嘅機會。
黃智雯
tvb當家花旦之一嘅黃智雯原來出道前曾經喺國泰航空做過3年空姐，2007年參選香港小姐，入圍最後五強，雖然未能奪得獎項，但就簽約無綫，出道做藝員。
tvb有唔少女藝員喺出道前都做過空姐，除咗黃智雯，仲有劉佩玥、譚小環、陸詩韻等等。
陳展鵬
其實陳展鵬係無綫藝員訓練班第7期訓練生，1998年更加簽過唱片公司出單曲做歌手。不過金融風暴後，香港經濟低迷，陳展鵬工作大減，於是就跟打桌球認識嘅判頭落地盤工作。
但陳展鵬無放棄到佢嘅演藝夢想，佢先加入亞視，到2008年再次重返無綫，終憑《城寨英雄》「拳佬」一角奪得視帝！
陳展鵬（香港）（@rucochan）分享的貼文 於 PST 2016 年 12月 月 20 日 下午 8:10 張貼
蕭正楠
原來蕭正楠同陳展鵬係小學同級同學，佢喺大學修讀電腦系，畢業之後做過電腦程式員，估唔到蕭正楠做過IT行業啊！
佢2001年參加歌唱比賽獲得冠軍後入行，02年簽約唱片公司後仲橫掃當年樂壇新人獎添！時隔多年同小學同學陳展鵬喺tvb重逢，呢啲咪緣份囉！
王浩信
Signal Wong 未入娛樂圈之前係做平面設計師，因為一次唱卡啦OK得到經理人發掘，之後正式成為歌手，簽約唱片公司，約滿後加入無綫，更喺2017年奪得《萬千星輝頒獎典禮》「最佳男主角」。
佢話囡囡遺傳咗自己嘅設計天份，鍾意畫畫，兩父女更加以畫畫油顏色等方法溝通。
姚子羚
姚子羚入行以嚟多數飾演溫柔、淑女角色，但原來佢係籃球高手，曾經喺乙組球隊擔任前鋒，真係估佢唔到啊！
佢喺中學時已經係校隊成員，之後仲加入本地聯賽隊三年，直到去澳洲升學先離隊。佢喺2002年參加《TVB8全能主持比賽》奪冠後就加入無綫成為藝人，都做過唔少角色。
唔講都唔知佢哋入行之前做過唔同嘅工作，有啲真係估都估唔到啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0