游學修早前夥拍許賢（腎仔）及蘇致豪（豪哥）開設YouTube頻道《試當真》，兩個月已成功吸納逾10萬人訂閱。昨日他們就公開一條以《Channel需要錢》為主題的新片，透露搞Youtube需要大量資金，更膽粗粗致電給影帝古天樂及杜汶澤叫對方「課金」做金主，點知慘食檸檬。
游學修表示開台至今不停「燒錢」，水費、電費、煤氣、屋租及邀請袁澧林（Angela）的演出費等，營運開資是負170多萬，雖然有廣告收入，但都不能平衡製作費，又自爆為頻道買打手及訂閱，更找來朱柏康出演扮黑客賣資料給他們。之後游學修膽粗粗打畀古天樂及杜汶澤希望他們可以做金主，不過古天樂聽狀即勁冷漠以「無興趣」及「唔考慮」結束對話，杜汶澤就直言「阿修，其實你唔好以我真係咁掂先得㗎。我自己事實都有個電視台，咁我點解又無端端投資落去你嗰度呢，係嗎？」最後更調轉頭叫游學修加盟他的電視台。
最後游學修為了吸金，決定開設會員制，更跟腎仔及豪哥跑到去ViuTV的九龍灣電影廠外，希望找《全民造星3》的參賽者幫他們拍攝宣傳片，期間AnsonBean、關嘉敏、Buber、KLau及CY等都拒絕，場面尷尬，最後游學修巧遇好朋友華dee，游學修叫對方幫手「錄幾句」但被拒絕，之後二人就扮拗交，游學修爆出一句「你而家ERROR，你以前劉德華咋，冇我會有你？」最後華dee更引用卓韻芝在《全民造星3》的金句「唔好啦」收場，非常搞笑。
新片出街後得到網民力撐，公開短短14小時已有12萬點擊，不過片中因為有「藍絲」鍾培生客串演出，有網民就留言「唔希望再見到鍾培生」、「有鍾培生唔like了」。
