王丹妮（Louise）過去五個月都在多明尼加共和國拍攝外國全英語對白演出的電視劇《Coolie》，日前終於煞青，Louise亦能夠趕及返港出席金像獎頒獎禮，與《毒舌大狀》的團隊一起分享獲得「最佳電影」的喜悅。同劇亦有張孝全、鮑起靜、Mauricio Henao等人主演，她又自揭被男神張孝全圈粉，新婚後見到對方多過老公羅孝勇。
大約三星期前，王丹妮曾特地返香港拍攝金像獎特刊，趁機陪囡囡雅念玩了兩日再趕返巴拿馬完成最後拍攝，直至日前才正式煞青回港。她直指今次到多明尼加拍劇五個月，是自己有史以來最長一次遠行工作，令她非常掛念老公Sheldon和囡囡。「以前出門做嘢最多三個月之後，就會返香港唞一唞之後先再去第二度。但今次時間就再耐啲，honeymoon都無就同Sheldon say goodbye 到而家都未見到面，只靠視像變咗網戀，下星期Sheldon 有一個禮拜假期可以返香港，我哋終於隔咗五個月之後再見面，所以好期待！」
今次Louise拍攝由台裔美籍導演陳駿霖執導全英語對白演出的電視劇《Coolie》，近日更收到《Coolie》監製通知該劇正在康城舉行的MIPTV賣片活動中，廣受買家歡迎，令她更期待透過此劇讓國際觀眾認識自己。而完成這次漫長拍攝之旅後，Louise忍不住的說：「終於可以同另一半Sheldon（羅孝勇）重聚；因為五個月前完婚後才兩天，還來不及渡蜜月，我便要飛往多明尼加共和國開工。跟囡囡和老公分開兩地，想死我了！」
除了老公和女兒之外，身在外地Louise最掛念就是香港的美食，並分享當地人的飲食口味說：「好掛住牛雜河，辣嘢同埋米線，因為嗰邊冇，當地人唔鍾意食辣，反而啲嘢食好鹹，好似成樽鹽倒瀉咗咁…又或者啲嘢飲好甜，半杯都係糖…哈哈。」
Louise很幸運遇上友善的劇組，讓她輕鬆地渡過五個月的拍攝，又可跟鮑起靜和張孝全偷師演技，Louise先大讚男神張孝全，指自己已被圈粉。「平時我哋兩個都係比較文靜少少比較怕羞嘅人，但係孝全個人非常好，亦都好Humble （謙虛）。拍攝嘅時候兩個人感覺都幾有默契 ，所以我哋嘅場口其實大部份時間都拍得好順利。現場拍攝團隊入邊嘅女仕們全部都俾佢性格同造型迷倒，佢哋仲即刻搞咗個Fans Club，我都係高級會員！」
至於面對影后級鮑姐，Louise形容興奮多過緊張，自己儼如上了堂演技進修班：「我同鮑姐合作拍攝嘅時候真係完全見證到乜嘢係『一秒入戲，快靚正』 ！所以拍攝當下我只係focus 努力做好表演，唔記得咗緊張。」此行鮑姐丈夫方平都有同行陪拍，Louise更主動做小導遊帶兩位一齊到處遊覽。
除了3位主角之外，今次Louise參演這部作品結集來自逾40個國家的劇組人員，加上異國情調，風光明媚國度下拍攝，Louise感恩今次參演獲益良多。「團隊上下大家都被南美洲熱情嘅文化日漸影響，例如聽到音樂就會起舞唱歌，同佢哋一齊工作，我自己各方面都學到好多亦成長咗好多。以拍攝完煞科個刻真係好唔捨得，返酒店睇住大家簽晒名送俾我所嘅卡同文字都忍唔住喊咗。煞青party大家都相擁而泣，始終大家唔係喺同一個國家生活，唔知何年何月先有機會再見。 」
至於今次新劇內容，Louise大賣關子亦相當保密，因此不少朋友和粉絲以為過去5個月她去了旅行，Louise笑言大家誤會了：「工作嘅照片暫時不能發到網上，所以大家只見到我終於有得放假嘅時候出去玩嘅日常，而難得放假就當然會搵嘢玩搵嘢食感受當地生活同文化，所以大家以為我返工返到去旅行度假咁，其實係錯覺嚟嘅，哈哈。」
