早前由兩大運動品牌 Polar x On 合作打造的「Polar x On 8 星期半馬特訓班」，已順利完成。這個訓練課程除了同步體驗 On 全新暢跑型跑鞋 Cloudflow 4 及 Polar Pacer 運動手錶之外，也為各學員於賽季的跑賽作好最佳準備。
而於 12 月 23 日（星期六），特訓班中就會有 3 位學員及藝人 Owen（吳雲甫），帶同 Polar 全新旗艦型號手錶 Vantage V3 及 On 跑步裝備，出戰台灣「2023桃園國際半程馬拉松」！
臨出發前，Insports Hub就與他們談談今次參加特訓班的得著及分享一下跑步故事。
Jeff，因為陪女朋友減肥而接觸長跑，兩人一起報了2017 年的渣馬10km，有幸跑出不錯成績。之後開始慢慢愛上長跑，並加入跑會進行更有系統訓練。幾年間成績慢慢進步，亦於2019 年尾的大阪馬成功Sub 3。
1. 跑步年資？為什麼開始跑步？
2016 年下半年開始，陪女朋友一齊參加品牌跑步活動，算係最初接觸長跑，就咁跑吓跑吓，原來都跑咗7 年喇。
初初會去跑步，除咗係陪女朋友之外，咁我本身都有踢波嘅，年紀開始大，又唔想喺球場上跑唔郁，咪當順便練吓體能囉，點知跑跑吓，而家連波都無踢喇！
2. 有沒有跟跑會或教練跑？選擇原因？
2017 年渣馬之後，女朋友就開始正式入咗樂家跑會練跑，無幾耐我就跟住入埋去喇，不過跟樂家又並唔係完全因為女朋友嘅原故喎！
家豪亦師亦友、搞笑抵死當然不在話下啦，但其實貞哥（姚潔貞）都係一個好重要嘅因素。
記得有一個星期二嘅晚上，女朋友如常去樂家練跑，我就自己喺運動場跑吓圈，跑完就喺跑道附近做吓體能；點知貞哥見我啲動作做得唔太正確，唔單止出聲糾正，更加即場示範俾我睇。我一早已經知佢係奧運級人馬，而我只係佢其中一班學生入面其中一個新同學嘅男朋友！就係呢個差距，我覺得呢個跑會不得了！
3. 最深刻的一場賽事？原因是…？
講起上嚟可能有啲老土，又可能因為我跑嘅比賽唔算多，但每一場我都覺得好深刻。有啲跑得好，有啲跑得衰；試過抽筋到好似跳舞咁，又試過以為自己好型咁衝帶；試過行都要行返終點，又試過中途棄賽…但如果講最深刻，我諗應該都係初馬啦！
當年未有太多全馬嘅概念，更加未諗過要跑全馬。不過抱住人抽我抽嘅心態，竟然俾我抽中咗東馬，咁無得唔跑啦，決定要上馬了！可惜喺練習上自己處理得唔係咁好，到後期有少少傷同埋overtrained 嘅情況出現。
不過落得場就盡力啦！頭10km 左右都好似好理想，但再跑多一陣腳就開始有啲唔舒服，諗住跑慢少少回一回，點知咁就出事喇！當時天氣得2-3°c，我就只係背心加短褲，連對手袖都無，加上一直落住雨，然後我再減速，成個人愈嚟愈凍；凍到肌肉根本發唔到力，跟住就愈跑愈慢，愈慢就愈凍，最後仲凍到失溫、斷片添！不過原來我斷咗片都返到終點，就好似飲醉酒斷咗片都仲返到屋企咁！
4. 最喜歡的跑步用品品牌？最喜歡一對跑鞋？
呢個問題好難答！以前啲人成日問我最鍾意邊個歌手，我會話「無特定㗎喎！」因為只要係好歌，我都會去聽、鍾意聽。同樣道理，只要係好鞋，其實品牌對我嚟講唔太重要。（當然白色係會加分！）
如果要我而家揀一樣最鍾意嘅跑鞋，應該係adidas 嘅Adios Pro 2，可能因為著佢嘅時候咁啱係自己最fit 嗰一排，基本上係覺得著咗佢就乜嘢課表都會跑到，無敵！雖然暫時全馬同半馬PB 都係著Nike 嘅Alphafly，但我應該都係鍾意Pro 2 多啲！
5. 你已跑進sub3成績，今次為什麼會參加「Polar x On 8星期半馬特訓班」？
講出嚟可能又會俾人打，但我覺得自己跑sub3 真係一啲都唔算快，都唔使同世界各地比較，就喺香港求其去一個練跑地方問吓，可能都會有幾個喺附近……
教練講過：「想全馬跑得快，10km 同半馬都要跑得快！」
自從練咗全馬之後，有時都會有意無意喺短途練習上面揸吓流攤，畢竟全馬program 較著重耐力，相對唔使跑咁快，比較輕鬆。但咁樣好難有大進步，而今次有兩大品牌提供裝備，又有我最信賴嘅教練安排課程內容，我諗唔到有乜嘢理由唔參加喎！
6. 參加今次特訓班最大的得著是什麼？
第一樣一定係隊友！
我原本係想低調行事，練習唔多出聲，練完就走咁。但可惜紙係永遠包唔住火嘅，第一堂我就已經加入咗「氣氛小組」喇！然後一直去到最後一堂，我因為唔舒服而未能出席，隊友們關心慰問之餘，喺我之後自己嘅練習都仲會提我要著多件衫唔好冷親，好有愛！隊友間嘅互相推動，令練習變得更有質素固然係其一，但呢種隊友間嘅互相關懷就更加難得！
另一樣係On 嘅跑鞋！
本身對呢個品牌認識唔深，以為其跑鞋都係以fashion 為主，但今次確實令我刮目相看！初初見到Cloudflow 4 嘅外形，以為係會比較重，屬於保護性強嗰種，應該都係慢跑鞋；點知拎上手出奇地輕，著上腳感覺都好好，然後原來跑速度課都一啲都唔輸蝕，仲好好反應添！睇嚟之後要留意多啲呢個品牌嘅鞋先得！
7. 對比以前，Polar Pacer（運動手錶）對你的訓練帶來什麼的不同？
大多數跑手都係以速度或時間去作為訓練強度嘅參考，往往忽略咗聆聽自己身體嘅聲音。Polar Pacer 可以俾我，甚至乎係教練，以心跳為基準，即時掌握身體對訓練強度嘅真實負荷，能夠更有效安排訓練及回復，減低受傷風險，為比賽作出更好嘅準備。
8. 知你快會參加桃園國際半馬，今次的目標是？訓練上有什麼準備？
就好似之前咁講，呢一年狀態都好一般，所以唔敢或者係唔識去定啲乜嘢目標。不過唯一一樣係，希望可以好似以前嘅每一場比賽咁，全情投入，享受比賽！訓練上就交返俾教練啦！
9. 知道之前你的寵物去世，可以說說那次經歷及怎樣平伏嗎？
狗狗係喺我台北長榮航空馬拉松之後走嘅。
其實自從今年年頭中咗Covid 之後，我嘅狀態就一定無好過，仲變得愈嚟愈差，渣馬失手（金）不在話下，之後嘅練習更加係慘不忍睹。雖然最近靠中醫調理身體，情況慢慢好轉，但都遠遠未回到當時水平，所以本身長榮馬都無預期會跑出乜嘢亮麗成績。而家中狗狗身體狀況忽然變差，我喺台北兩晚基本上都唔係好瞓到，所以連僅餘嘅狀態都無埋。比賽起步後無幾耐我就開始放慢腳步，再過多陣我就選擇咗棄賽，可能係我近年最軟弱嘅一次！
10. 之後的跑步目標（賽事、成績）是什麼？
之後嘅跑步目標應該都係以全馬為主，如果要講時間，暫時可能係想跑到240-245 左右啦！
11. 你認為跑步為你帶來最大得著是甚麼呢？
Never limit yourself！
2017 第一次跑渣馬10km，成績尚算見得吓人，但估唔到兩年後可以用差唔多嘅速度跑個全馬！所以真係唔好低估人嘅能力，只要肯認真練習，慢慢就會有進步㗎喇！
最後一題，有什麼社交媒體可以找到你？
IG: running_abalone
FB: Jeff Cheung
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/
留言 0