【襯晒色係咪情侶裝？】余德丞拍住蔡思貝復工 單膝跪地送花

28歲無綫新晉男神余德丞（Dickson）上個月踢波期間暈倒昏迷，之後喺ICU留醫近一個月時間，先獲醫生批准出院。出院後嘅Dickson，先後出動過食切腩撈粗，之後又探過DoDo姐同江美儀班。

休息一排，Dickson今日復工喇，同蔡思貝一齊喺將軍澳一個商場出席活動，身形仲比起之前見佢食切腩撈粗再肥番啲、健壯啲。

兩個人襯晒黃黑色嘅衫，一直有傾有講甚有默契，不斷打情罵俏，而台下就有幾十名fans舉住大大個「余德丞」牌迎接男神。

兩人未上台前，已經咬緊耳仔，蔡思貝喺台上講到最近接拍新劇好忙，Dickson就相反近日多處於休息狀態，得閒就睇下戲見下親戚，但佢就話：「醒番見到蔡思貝變咗咁短頭髮，唔認得你。」兩人之前合作旅遊節目，今日一齊玩遊戲都好合拍。兩人同觀眾插完花後，大會安排余送上一束花俾蔡思貝，Dickson仲好識做，單膝跪地咁送上。蔡思貝父母今日到有去到活動參觀，活動之後Dickson同蔡思貝、蔡思貝父母一齊合照，個情況就好似情侶見家長咁，好溫馨。

精選娛聞，喺晒《娛果》
http://fb.com/appledailyent