[香港奇石] 大澳將軍石

香港境內有幾舊稱為「將軍石」嘅奇石，其中大澳嘅將軍石可說係最易去，同埋最出名。大澳將軍石係大澳地標，身高10米，面對著伶仃洋。離遠睇，石頭就似一位將軍倚住山崖休息。

有人可以將呢舊石分開做頭、胸、腹、腳。更有人喺腹部同腳部之間，發現一個凸出之處，就話佢係「鹹濕將軍」喎。人心邪嘅話，睇乜都係邪嘢架啦。

「將軍」搞大人個肚?

大澳上一輩原住民流傳一個故事，話將軍石對住大陸嘅唐家村。某個年代唐家村有女仔無緣無故腹大便便，有風水師話係「將軍」搞大人個肚。於是唐家村村民偷偷地坐船過大澳，打斷將軍石嘅子孫根。所以，而家嘅將軍石「跨下」只係微微凸起。

筆者專誠搵過一位祖藉珠海人士，佢話珠海唐家灣附近真係有條唐家村，同大澳只係隔咗個海。所以大澳原住民嘅講法，亦唔係完全吹水。