「中國香港同心護港總會」同「反黑金反港獨關注組」今日(8日)拉隊去到美國駐港澳總領事館示威，抗議美國國務院負責東亞和太平洋事務助理國務卿康達(Daniel Kritenbrink)，接見涉違反國安法被港府通緝嘅郭鳳儀、袁弓夷、許穎婷同邵嵐，反對美國勢力干預中國香港法治和內政。
白白錯失直接表達意見機會
但係勢估唔到美國駐港總領事梅儒瑞竟然行出領事館，企喺班示威者前面笑住自拍。示威者們高舉五星國旗，拉起「強烈譴責美國國安雙標，公然包庇反中亂港分子」橫額，唔知係太專心示威，定係唔認得梅儒瑞，竟然留意唔到眼前呢位自拍人士，就係總領事本尊，狹路相逢，都冇把握機會衝出去，咁就白白錯失咗直接向總領事表達意見嘅機會。
梅儒瑞事後將自拍相片上載社交媒體，仲出帖話「今日領事館外有示威者抗議我哋捍衛自由同為人權發聲。雖然我同佢哋意見唔同，但係完全支持佢哋行使和平示威嘅權利。」似乎示威者們下次要一眼關七，留意住總領事會唔會再走出嚟親自接收佢哋意見。
▼有團體抗議美國官員接見被通緝港人▼
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)