47人案求情｜親手聘請施德來、何啟明　兩人罪成　旁聽譚國僑憶何見工直率批民協

連續兩周，頭髮灰灰的民協元老譚國僑都來旁聽「 47 人案」，目送犯人欄裏，自己昔日聘請的施德來和何啟明。九西參選人何啟明今（ 10 日）求情，譚國僑憶起何啟明見工時，直率的批評民協「左搖右擺」，笑言「佢嚟應徵，雖然我叫你畀comment啫，但你好直率咁講，我係好appreciate。」

「人嘅一生，好多嘢都有起有跌，有好多嘢唔係你預期。你當睇為一種，點樣處理都係對一生人的重要學習。」他知道，何啟明雖身在囚牢，但仍然積極，他說，不會特別跟他說加油打氣，希望他能好好裝備自己，「我知道佢都做緊……」

攝影：梁文熙、Jimmy Tse

原本是公民黨成員的何啟明，約十多年前加入民協，最初應徵民協的政策研究員（researcher）。何啟明由形象中產專業的公民黨，轉投來基層面向的民協，令當面試的譚國僑大感興趣，「我又唔會計較 background 嘅，不過就覺得好奇怪，兩個政黨好唔同㗎嘛！」

形容何啟明表現「好直率」

何啟明面試的表現，令譚國僑驚喜，多次說他為人直率。「講到晒民協一路以來外界嘅comment，好直率。佢嚟應徵，雖然我叫你畀 comment 啫，但你好直率咁講，我係好appreciate。」

他說，何啟明直接指出民協立場「左搖右擺」，定位無法吸引公眾，但何卻欣賞民協的實幹地區工作，希望參與其中。

譚國僑說，估計因何啟明在深水埗成長，對社區有一定情義結，因此大學畢業之後便想投入社區。「坦白講，大學畢業，如果你想講上位，個support 我估民協未必畀到佢好多。所以你一定有啲動機，覺得社區重要。」

何啟明工作「快手」、認真，而做政策研究的他，始終想做地區工作，於是民協就讓他到南昌東跟隨前區議員梁欐。「佢睇到我哋做社區做得好過癮，佢就心動…… 就話好啦，你落去跟梁欐。」

師承梁欐　大坑西邨街坊願求情

已故的梁欐，自 1991 年起做了 16 年南昌東區議員，譚國僑形容他資深實幹。該區多為私樓，與民協傳統主打的公屋區不同，需要跟大廈法團交流。「變咗係佢師傅，啟明都好主動問嘢，請教佢法團、大廈維修嘅嘢，見到佢好投入」。2015 年梁欐因病離世，譚問何啟明：「係咪ready去接佢個位？」，何一句「ready」，獲得民協全力支持在該區深耕細作。

他說，今天何啟明成熟了很多，最初或因工作而接觸街坊，但慢慢的，看到他付出真心，獲街坊欣賞，石硤尾街坊和大坑西邨街坊，都大坑西邨街坊。

此刻回首，假如當初沒有聘請何啟明，世界會否不一樣？「政治冇如果，有樣嘢好真，政治變化好快。唯一有點惋惜，唔會話拉咗佢落水，我睇到佢係好有承擔嘅後生仔，佢有啲life plan可能無奈地停咗。」譚國僑嘆道。

早兩星期，譚國僑探望還押中的何啟明，笑著說：「佢ok 嘅，我見到佢就話，你仲肥過我喎！」他說，何啟明已有準備失去自由一段時間，正思考將來，裝備自己。

保釋期間　到神學院進修

這兩年，何啟明到中國神學院進修，現已完成課程。「一般人有案在身，心情同學業都會受影響，但佢都跟住行程完成，入咗去佢都諗緊進修，睇到佢係好願意裝備自己嘅人。」

「人嘅一生，好多嘢都有起有跌，有好多嘢唔係你預期。你當睇為一種，點樣處理都係對一生人的重要學習。」他說，不會特別跟他說加油打氣，但希望他能好好裝備自己，迎接未來，「我知道佢都做緊……」

歡迎追蹤以下平台，即時接收《集誌社》最新資訊，及付費訂閱支持！

【付費訂閱《集誌社》】
https://thecollectivehk.com/subscribe/

【訂閱《集誌社》Youtube】
https://www.youtube.com/@thecollectivehk

【Like 《集誌社》IG】
https://www.instagram.com/the_collectivehk/