小肥與前度過同居生活　爆側田轉戰同志吧：女性有企圖

由澳門來港發展多年的歌手小肥過去憑《寵物》、《一首歌》等大受歡迎，近年勇敢出櫃後不時為同志平權發聲，除了早前兩場麥花臣演唱會獲好評，年底更將推出全新專輯，他近日接受電台專訪，透露新碟6首作品代表6種顏色，源自LGBT六色彩虹旗的突破概念外，更分享了入行17年來，贏盡圈中不分直孿的友誼秘訣，他更大爆好友側田喜愛蒲同志吧的原因。

小肥早前在麥花臣舉行兩場《完全變態》演唱會，獲多位圈中好友力撐，除了RubberBand主音6號做和音，側田更自薦任首場嘉賓。原來早於2020年公開出櫃前，小肥已與不少圈中朋友剖白其性取向，他指沒擔心會被朋友出賣秘密：「我無諗過要擔心，但其實當時係應該要擔心嘅，因為我之前乜都講！」

小肥07年入行與側田成為同門師兄弟，卻於2018年才成為知己：「我同側田friend係因我話畀佢知我性取向，當時佢完全無嘢，仲話有個uncle同我一樣，想帶佢去香港同志酒吧。之後仲同我分享，話同志酒吧好好，話平時去一般酒吧，會感覺女性有企圖的眼光，而男性又會畀佢敵視嘅眼光，但去到同志酒吧，佢話大家都好nice，佢好鍾意嗰個氣氛，之後再叫我一齊去，仲話唔再鍾意去一般酒吧。」

公開出櫃後，小肥曾承認因疫情結束了一段港台異地戀，坦言至今已單身兩、三年，他在電台訪問中表示暫無意再認識新男友，目前跟分手多年的前度同居，與對方的感情已昇華成親人：「現在我哋互相信任，會去到感覺如果我走先，佢會幫我處理身後事，實質上，佢宜家亦幫我處理好多工作，無咗佢我搞唔掂，係變咗屋企有一個精神伴侶。再加上上次異地戀分手，亦因為我同我EX（前度）嘅關係令某啲人卻步，會問點解仲住埋一齊？我費事再解釋，你接受唔到我有一個親人響屋企就算！唔該你行開！感覺好煩，我寧願唔要。」

近年小肥參與了不少同志平權活動，被問到有什麼抱負，他有感而發說：「我只係做得幾多得幾多，喺我眼中，我以為世界已經好美好，但喺演唱會前我做好多唔同平台嘅宣傳，亦有講性小眾話題，就睇到有啲留言唔係我想像咁美好，仲有好多反對同誤會嘅聲音。你純反對，我無嘢好講！但你誤會我哋，我就有啲遺憾。」他又補充發送訊息，只是想同自己友打氣加油：「希望佢哋唔好咁驚，只係希望大家可以各自和平快樂生活。」小肥指會繼續宣揚大愛，正計劃每年一次舉行宣揚社會大愛包容的演唱會。