【好有家教】15歲光希直抵柴灣開工 靜香殿後怕搶囡囡風頭

木村拓哉嘅15歲細女光希今日首度襲港，由星媽工藤靜香陪同展開三天工作，兩母女嘅親民態度爆燈，比起不少韓星簡直差天共地。

光希同媽咪前後腳步出機場禁區，當上一架黑色七人車後，一行人直抵柴灣港利中心為雜誌拍照，今次又係光希先行由工作人員護送落車，隨即步入工廠搭貨lift到影樓，見佢沿路不停揮手及甜笑，真係揮手都揮到手軟。

至於殿後嘅靜香明顯免得搶囡囡風頭，甘願做光希背後嘅星媽，佢隔一陣終於落車進入大廈，靜香亦十分識做，既放慢腳步任影唔嬲，又叫在場記者小心絆倒，臨走亦有向鏡頭揮手。

精選娛聞，喺晒《娛果》
http://fb.com/appledailyent