呢排天氣寒冷，有前議員今日(27日)去荔枝角收押所探望被還押嘅民主黨前主席兼前議員胡志偉，事後引述胡話唔怕凍，事關喺監房訓練有素，經常沖凍水涼，保持健康，仲覺得今年比舊年暖啲添！
胡志偉因參與2020年民主派「35+初選」，涉違反《港區國安法》被控串謀顛覆國家政權罪，還押候訊。前議員喺社交平台貼文，話胡一貫積極，認為既然好多因素掌握唔到，就保持心境平靜同坦然，又話人在囚牢，只能夠保持身體健康同精神健康，最壞嘅事若果要嚟，惟有做足心理準備。
前議員話胡志偉鍾意踩單車，每當講起胡以前喺美國踩單車嘅日子就眉飛色舞，又話胡始終認為要令單車普及，並唔係靠幾條單車徑就得，亦唔好怕單車令交通意外增加，事關喺行車路踩單車嘅人唔會係初學者，而係對自己嘅技術有信心嘅單車常客，識得喺路上同其他車輛彼此留意，反而可保平安。
東網網站 : https://on.cc/東網Facebook專頁 : https://www.facebook.com/onccnews/
