愛華頓上季逃過護級死劫，但換季後情況不進反退，特別係喺xG、場均入球、平均射門命中率等等可以量化門前表現嘅數據，全部都排喺英超靠後嘅位置。
面臨上半季嘅頹廢，愛華頓高層喺冬季轉會窗完結前大刀闊斧，辭退戰績欠佳嘅教頭林伯特（Frank Lampard），請嚟作風老派嘅桑戴治（Sean Dyche）力求護級，同時賣走早有離心嘅青訓產品安東尼哥頓（Anthony Gordon）。
自此，愛華頓4場兩勝兩敗，戰術踢法愈見進取。不過，埋門一腳依然係球隊死症，17個入球總數排英超包尾，把握力問題一日唔解決，降班命運始終難逃。
上場英超比賽，愛華頓對阿士東維拉，沿用前一場贏列斯聯1-0嘅正選十一人，雖然最後輸比維拉0-2，但愛華頓掌控比賽嘅決心更見強盛。其中一個原因值得參考嘅原因，今季新簽嘅法國前鋒慕比（Neal Maupay）呢兩場都打正選箭頭。
慕比係踢法全面嘅前鋒，樂於跑動迫搶，亦有串連組織嘅能力。排出4-1-4-1對陣維拉，慕比主要干擾對手雙中堅嘅持球，而中場杜古利會殺上前場支援慕比，防中奧拿拿再進一步補位。加上閘位同翼鋒對維拉閘位持球嘅夾擊，愛華頓形成一個前場迫搶嘅陣式。
不過，戴治風格比較直接，進攻靠左翼麥尼爾出波為主，慕比在陣雖然可以令進攻戰術運行得更流暢，但球隊冇辦法靠佢將攻勢轉化為成入波。戴治陣中最適合做finisher嘅前鋒係卡法路雲（Dominic Calvert-Lewin），可惜佢喺戴治教第一場贏阿仙奴嘅時候傷到大腿，而家仲要休戰。191cm高中鋒森斯（Simms）火候未夠，難以擔正。
喺卡法路雲缺陣下，球隊前場冇人可以有效咁直接將靚嘅傳中化成有威脅嘅攻門，往往要靠奧拿拿後上接應。戴治教嘅第一場爆大冷1-0打贏榜首阿仙奴，靠嘅係麥尼爾、達高斯基兩個戴治嘅舊部，炮製角球頭槌一箭定江山。但球隊要令進攻死灰復燃，單單執行死球攻勢並唔足夠。
不過，參考喺維拉後場搶回搶斷成功嘅次數多達7次，喺強調直接足球嘅戴治手下，呢個數據已經算係非常亮眼。box-to-box中場杜古利會主動持球進攻，全場8次盤球成功，有5次係喺慕比76分鐘退場後完成。
要執正愛華頓嘅進攻，四場比賽絕對唔夠，但至少戴治手下已經見到𥌓光同驚喜。
留言 0