《全民造星IV》3號邱彥筒（Marf），以跳舞演繹《Pass that Dutch》成功獲三盞紅燈，擊敗「重讀生」80號方方晉級60強，不但獲評判和導師讚賞，亦得到大量網民支持贏得合理。Marf今次參賽全因Rock Sir（MIRROR排舞師）鼓勵，而憑住跳唱實力，她亦成為《造星IV》幕後眼中的10強大熱。撰文：杜杜、秦詠姿 攝影：葉君海、沈健程
19歲的Marf因喜歡小動物，畢業後去了當獸醫護士，後來發覺最愛都是做表演，於是轉為兼職護士，一邊發展表演事業，當過模持兒及舞蹈員的她，剛有公司邀簽約便遇到《造星IV》機會，加上有老師Rock Sir（MIRROR排舞師）鼓勵參賽，「我中學時跟過RockSir學舞，有次拍嘢見到佢，佢叫我不如去試吓《造星IV》，平時佢好少咁認真講嘢，本來我諗住入娛樂圈有啲恐怖，唔好搞啦！做舞蹈員都幾好，冇咁大壓力，但自己仲未二字頭，就試埋今次，睇吓自己有幾多斤兩，朋友同屋企都好支持，Rock Sir之後都有同我打氣。」
因病一度失自信
Marf承認這次比賽壓力不少，令她一度失去信心，「會好有無力感，因為唔會有時間畀你去準備，自己唔係天生表演者，咁少時間做咁多嘢好大壓力，成日覺得好多嘢未準備好。」本身對跳舞較唱歌有信心的她，早前一度氣管炎加感冒，令她信心全失，「最挫敗係之前唔舒服，飊唔到某啲音，唱歌好唔好聽係見仁見智，但嗰個音要上得舒服，想練歌都練唔到，又好擔心，因為時間好緊迫，好無奈同好大無力感。」
據知Marf參賽期間因唱跳同樣出色，在《造星IV》幕後眼中的10強，她得知後未有加強信心，「希望係，我有信心可以做好表演，但係有冇信心去到最尾就有所保留，始終能力同大眾想要嘅嘢唔一樣，歸根究底睇大家口味。」不過她已決心入行，就算未能加入女團也會繼續演藝事業，「比賽後我更加清楚自己鍾意表演同埋創作，好想出自己創作嘅歌，可以一手包辧，至於戲劇、綜藝都想試，特別想拍靈異節目，雖然自己好驚，但又好想試，仲有好鍾意拍攝同動物有關嘅嘢。」