姚焯菲（Chantel）之前亮相《聲生不息‧大灣區季》，與3位樂壇前輩容祖兒、薛凱琪及衛蘭合唱《女神》，表現大獲好評，令內地觀眾眼前一亮。
昨天（19日）Chantel在threads貼舊照並抒發感受，她表示《女神》片段播出後，突然回想一張在新西蘭和粉絲影的合照，相中的她身穿粉紅色露肩上衣兼淺笑，她表示粉絲甫完合照翌日，她收到好多負面信息，見到香港不少標題都談論該照片，她寫道：「我記得果（嗰）朝仲要係放完假第一日返學，所以加埋呢啲新聞，心情特別差。
但係我好快諗返起影呢張相嘅同一日，著住同一件衫、素顏，我去咗間餐廳。有一位陌生人媽媽突然走過嚟同我講咗聲"you are so beautiful"。我個心暖咗一暖，但係冇諗過呢句說話，對第二日嘅自己會有幾重要。
重要嘅原因係我學識咗，同一日﹑同一個樣可以有人話你靚，有人話你醜，呢啲評語已經唔需要在乎，反而唔好被呢啲評語，動搖自己嘅自我價值先係最重要。
同埋唔好忘記呢個世界好多人會唔欣賞你，但係總有一個會。一個已經夠。所以未睇嘅朋友快啲睇啦，幫你打氣﹗」
（即時娛樂）