請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

【余建在言】四大嚴重矛盾設定 令《I SWIM》游極都唔到岸

當你捱完30集《冥冥之中》,喜見緊接播出的是重頭劇《I SWIM》,眼前就好似有道曙光淡淡滲出,還怕10集唔夠喉,在衝得興起時,便要結束。殊不知一切都是個人意願,上星期播完首5集已覺有不妥,來到今個星期劇情更加大暴走,10集,原來都可以好漫長。

眾多角色中,焦Sir是第二討好角色,第一是余浪沖。

要數《I SWIM》的問題,選角、中學背景、鏡頭,各有參差的問題,但最大問題必定是劇本。一個有具吸引力的劇本,可以從一個矛盾作出發點,只要夠紮實有理據,便可衍生往後的情節。古惑仔去教書變成《麻辣教師GTO》,少林師兄弟學踢波就變《少林足球》。《I SWIM》都想用此公式推進,第一個矛盾位是一個不會游水的老師Miss翁(吳海昕 飾),帶領一班長期屈居亞軍的學生迎來全校冠軍。

一個不會游水的老師Miss翁(吳海昕 飾),帶領一班長期屈居亞軍的學生迎來全校冠軍。

這情節大可成立,但Miss翁做過咩激發起班學生?為同學打氣?跌落水等人救?帶同學仔去靈探?樣樣做齊但冇樣關事,而她的角色存在就是為搞一場師生戀,這亦是第二大矛盾位。師生戀的設定就是一場犯禁的戀愛,理應要曖曖昧昧帶出想愛不敢愛的折磨,但觀乎李馬榮(呂爵安 飾)第一集表現,已經發動攻勢,而Miss翁亦開懷接受似的,既專程搵學生、又帶上屋企包紮傷口,完全春心蕩無避忌的模樣,都愛得咁坦白,又何必嚟個師生設定呢?

輸比賽令校慶失威就要打人,愛學校愛到傻咗。

第三個矛盾在於劇集未諗定想行漫畫誇張路線,定係寫實的技術層面。製作特輯上,講到劇組如何認真研究拍攝方法,又加操演員的泳姿希望拍出來似模似樣,連Stanley都話要減磅,接近番中學生的身形(但個樣已經出賣咗),看似樣樣要求嚴格,但轉個頭就出現冠中書院在一場比賽有4位學生同一時間衝線,帶來四冠軍!黃亞樂(邱仕縉 飾)賽前傷到腳,結果落到水用單腳踼水仲反追回5米的差距,然後對方輸比賽就要打人洩憤。就連李馬榮跟Miss翁,匿在檯底一晚的情節,都相當考觀眾智慧。說是漫畫,不如說根本不合情理,漫畫的天馬行空都不及你。

黃亞樂受傷,單腳照游照贏。
余浪沖50米當51米游,頭撞池,仲要贏埋比賽。

第四個矛盾是兩位主角,李馬榮與余浪沖(魏浚笙 飾),正是勤力與天才的火拼,這設定本應好睇,不過余浪沖的天才來得太理所當然,不是靠天賦贏在起跑線,然後加以訓練琢磨,他的天份就是自有永有,其中一集講佢學快速記憶兼彈琴,都係一望就識,結局篇更說他是7科5星星狀元,唔好理,劇情話係就係。

ANSONBEAN出場,但要睇佢演出可能要等電影版。

除咗四大矛盾位講唔通,大家又有冇發現去到大結局最後一集,有冇一場令人期待的高潮位賽事等緊大家呢?當尾二一集都已經出現ANSONBEAN,大結局佢原來只係負責向啟賢中學挑機,要睇對決,就要等相傳的電影版,如果你仲有興趣的話。

撰文︰余建

Facebook專頁︰https://www.facebook.com/Stupid.View

IG專頁︰https://www.instagram.com/Stupid.View