Twins紅館舉行14場演唱會在日前（6日）圓滿結束，雙生兒之一的蔡卓妍（阿Sa）經過兩日休息後，今日（8日）亦於社交平台發千字文分享感受，透露自己聲帶傷了幾年，事前相當擔心，又指過去22年走過不易，感激歌迷支持，記起自己心底最純粹的快樂及最簡單的自己。
阿Sa完成14場演唱會後，心情仍然激動，於社交網發文大談騷後感：「今日嘅我雖然個身體已經放緊假，但個心依然掛住演唱會嘅日子，14場呀！係14場呀！我哋完成咗一連14場嘅演唱會，唔單止打破咗我哋嘅紀錄，仲做到以前覺得係無可能嘅事，而且圓滿完成喇！好叻呀我地！！！」
阿Sa自爆籌備演唱會期間過著極度嚴謹又規律的生活，透露聲帶傷了幾年，事前相當擔心。「老實講做呢個演唱會之前我好擔心，好大壓力，因為體力都唔係以前細個咁，仲要連開14場係以前無做過嘅事，加上聲帶傷咗幾年，一直都搵緊唔同嘅方法去恢復，針灸、食藥、中醫、西醫、氣功、練唔同嘅發聲位等等，可以諗到嘅任何方法都有試過，抱著豁出去嘅心態盡自己最大能力去做呢一次演出，但真正開始咗之後，嗰種被大家激發出嚟嘅熱情同埋能量令我克服咗自己嘅心理恐懼，我依然係咁鍾意舞台，咁鍾意唱歌，咁鍾意表演，嗰一份初心依然熾熱、嗰種最純粹嘅快樂原來一直都在。」
阿Sa提到一對組合能走過22年，並不容易，二人一起經歷過大大小小的高低起伏，面對過無數次難關，經歷了不同人生階段，直言：「出道嘅時候又點會諗到可以走到咁耐。」她非常感激大家一路走來的支持，感觸說：「每一晚見到好多觀眾嘅面孔都好熟悉，有一啲係由我地出道就跟到而家嘅，有一啲係喺好多活動見過又好耐冇見嘅，有啲係佢哋好細個嘅時候見過，到而家有自己嘅家庭帶埋成家人嚟睇演唱會嘅粉絲，嗰種感覺就好似喺條街度撞番個小學同學咁，未必成日會聯絡，未必成日會見面，但一見到就好親切，想互道一句你好嗎？大部分嘅粉絲都已經走出校園，踏入社會，開始發現呢個世界並唔係你想像咁容易，要學習去面對同埋接受好多以前未見識過嘅人和事，要學會面對生活同工作中嘅壓力，又或者要承擔起為人父母嘅責任。」
阿Sa續道：「我哋開呢個演唱會就係希望，大家無論身分點樣轉換，入到嚟睇呢個show嘅所有人，都會記返起自己心底最純粹嘅快樂，嗰個最簡單嘅自己，暫時拋開生活中嘅煩惱，同一班相同頻道嘅人，去一次盛大嘅party，嚟一場青春嘅約定，感恩以前嘅自己，睇完之後又可以充滿力量、精神滿滿咁投入生活同工作。」
最後超額完成，阿Sa感激歌迷支持，又鼓勵大家：「人越長大，就越要記得向前看向前行。今次我又叉滿電喇，我會繼續向前，你哋都係呀！下次再見我哋大家都會係更好嘅自己！多謝大家。」
