尋找跑會的故事#14 | 賡班．佛系跑會即係輕鬆跑會?

魏賡教練嘅出現，令才疏學淺嘅我認識到「賡」呢個字，而且竟然有另一個幾乎一樣嘅字 -「」，中文實在博大精深。

作為本地數一數二嘅精英跑手 – 魏Sir，慕名而至拜師學藝嘅信眾當然不少，偏偏魏Sir嘅跑班「賡班」全無社交平台兼零宣傳，想加入嘅話只得兩個途徑 – 朋友介紹或喺街撞到佢 (跪求加入)…..如此佛系卻仍然桃李滿門，有麝自然香，名不虛傳!

精英跑手比人嘅感覺，想必具備嚴謹嘅自律性及利落嘅生活節奏，但魏Sir所經營嘅跑班偏偏隨心至極，不強求不廢勁，甚至感覺可有可無。作為精英跑手，魏Sir更罕有地於片中跟Peter閒聊自己日常喜歡到coffe shop嘆啡、影相、打卡…..大抵因為呢種反差令人產生一種莫名嘅敬重及愛戴。

以為佛系嘅教練就會係一個佛系嘅跑會? 佛系progam? 跑幾多練幾多隨心隨意?

估唔到嘅係，以為賽季將至一定係運動場內衝圈至爆肺方休? 當晚魏Sir竟選擇於運動場外跑圈，窩心嘅佢認為剛開季就衝圈，有可能令學員之間嘅互相競爭推快自己，此舉未必係最有效嘅訓練，反而於場外做節奏跑不單可為大家帶嚟新鮮感，兼可一洗搏命衝圈嘅沉悶，更重要嘅係，翌日醒來仍可精力充沛地嚟個恢復跑，以為乜都無所謂嘅魏Sir，原來已為學員諗過度過，如何長跑長有? 有版你睇!

一直認為跑步呢回事必需保持某程度嘅興奮度方能持續下去，曾拜讀匈牙利裔美國心理學家，奇克森特米哈伊 . 米哈伊嘅「心流理論」- 主要描述人類一種完全專注及投入於活動本身的心智狀況，繼而所產生嘅振奮狀態，感覺跟魏Sir呢種剛柔並濟因時制宜嘅方針有著異曲同工嘅況味，更了解到魏Sir所信奉嘅佛系絕非如我等廢青般不作為不上進不努力，反之花盡心思去令學生保持呢份興奮度，而學員所獲得嘅，可能就係呢種隨心而興奮嘅訓練過程，而當每一次跑步都帶著期待嘅感覺，會係多美好嘅一件事。全無官方報名途徑嘅跑會仍吸引眾多學員，唔通真係只因魏Sir靚仔咩 ?!

The post 尋找跑會的故事#14 | 賡班．佛系跑會即係輕鬆跑會? appeared first on Fitz 運動平台.