「唱作王子」馮允謙（Jay Fung）擔任《全民造星V》藍組導師，指導一班囝囝唱歌表演外，更給參賽者實戰機會。日前他為新歌《尋找隱世巨星》拍MV，歌詞有關追夢和堅持，精挑四位得意弟子王鋒、羅樂（樂樂）、雷濠權（Jason）和李嘉俊（Carson）上陣。對於Jay在節目中被經理人花姐指摘太善良，4位弟子揚言要好好保護溫柔的Jay老師，以行動證明不一定惡老師也可以出高徒。
Jay說：「今次拍MV嘅新歌《尋找隱世巨星》，我有份作曲、編曲、監製和填詞，搵埋T-Ma一齊編曲和監製，仲邀請咗一位新合作嘅朋友梁栢堅填詞，Young Hysan寫Rap詞。歌詞內容講夢想、堅持自己嘅風格去追夢，我好鍾呢首歌，好想同大家分享。」
在剛舉行的幾個樂壇頒獎禮中，Jay共奪得10個獎項，成為歌手之冠，問他滿意嗎？感到壓力嗎？他說：「我好滿意去年自己喺樂壇嘅成績，有人問我會唔會更大壓力？我覺得做音樂唔係特別為咗獎項，重點係做好音樂，壓力唔係嚟自有冇獎。」
今次挑選四位造星學員參與MV拍攝，Jay逐一介紹，說：「有好健碩嘅樂樂、好乖仔嘅Jason、好靚仔嘅王鋒，同埋好唱得嘅Carson。」Carson問他：「我都靚仔。」Jay哈哈笑說：「靚仔！成日問我你靚唔靚仔，哈哈！」他又笑言連埋他本人組成新Band「Rawrr」。他對4人說：「你哋今日嚟唔係做茄喱啡，真係有角色，我要睇到你哋有演技，緊唔緊張？」4人異口同聲表示已從另一位導師韋羅莎（Rosa）取經，學到很多演戲技巧，拍MV可以大派用場。王鋒笑說：「我哋今日係飾演一隊，我係一個唏噓嘅樂手。」Jay說：「王鋒好正能量，思想好正面嘅人，好適合呢個角色。」雖然Jay形容Jason乖仔，但拍攝他解開恤衫鈕，壞孩子低胸造型令人眼前一亮。Jay笑說：「佢係隱性Bad Boy，同我一樣，內心都係Bad Boy。」
拍攝MV前夕剛好開播《全民造星V》，眼見Jay導師被花姐在節目指摘太過溫柔善良，擔心他很難馴服一班學員。4位弟子立即為Jay平反，樂樂說：「最初覺得Jay好溫柔，認識後覺得佢比想像中更溫柔。」Jason坦言：「以前只係覺得Jay唱歌好好聽，比賽認識佢之後，發現佢對我哋個個都好好，所以佢叫我哋嚟拍MV即刻到，多謝佢諗到我哋，好驚喜！」王鋒說：「我哋睇到花姐鬧Jay，唔知點解好想幫佢平反，好想好好保護佢，佢係我哋好可愛嘅脆弱小寶貝。」大賣口乖，氹得Jay好開心。Jay說：「我係一個Good Guy，冇鬧過佢哋。點解我冇鬧佢哋？因為佢哋好乖。其實我好幸運，遇到每個學員都好勤力好乖，唔使我好惡，佢哋都可以好好。」
東網網站 : https://on.cc/東網Facebook專頁 : https://www.facebook.com/onccnews/
留言 0