荷蘭翼鋒加普（Cody Gakpo）落實加盟利物浦，作價£37M基本轉會費，即將喺冬季轉會窗加盟。呢位23歲左翼近幾年喺PSV燕豪芬進步飛快，上個月世界盃嘅精采表現，更加令佢一登豪門目光。
加普進攻意欲極強，輕盈嘅身驅加上188cm嘅身高，令佢喺保持速度嘅同時，比對手貼防後都未致於即刻輸身位。比起擅於停球後再短時間爆過對手嘅迪亞斯，加普嘅特色係「平穩加速」，能夠喺長途奔襲之中控制好自己同對手守將之間嘅距離，為自己爭取最好嘅接球空間。
啱啱完咗嘅世界盃，荷蘭3-5-2陣式企位偏後，後防同中場線夾擊反搶球權後，作為箭頭嘅加普，就有至少二三十碼嘅空位比佢去跑，將自身加速能力發揮得淋漓盡致。而荷蘭側翼嘅傳球、跑動輸出主要由兩翼衛負責，陣式上亦唔存在天然嘅翼鋒，左翼出身嘅加普打箭頭，喺組織嘅時候會偶爾去左路幫手，幫速度偏慢嘅左翼衛白蘭特補位。
喺前場反擊嘅戰術之下，加普嘅存在能夠大大縮短球隊由反搶到完成射門之間嘅時間，唔會刻意上腳拖泥帶水，白等對手佈好防守陣式。配合一個視野好、key pass技術精湛嘅play-maker，加普可以輕易竄過對手右閘同中堅之間嘅空隙，得到更多直接射門嘅機會。
除咗以拿手嘅速度進行突擊外，加普時而逗深持球，時而衝擊防線，甚至有能力擔當中鋒支點，遠射同配合突破禁區都交到貨。面對重重圍困時，佢都能夠喺禁區頂前後施放冷箭，冷靜嘅心理質素喺世界盃賽場展現出嚟。呢啲技能合而為一，亦都可以喺「偽九號」嘅定位上面展現出嚟，即係費明奴一直以嚟喺利物浦做緊嘅嘢。
除咗喺荷甲嘅表現之外，加普2021年開始踢國際賽，佢有份上陣嘅比賽，荷蘭都冇喺比賽時間內輸過，只有啱啱八強以十二碼大戰被阿根廷淘汰，之前嘅世界盃三場分組賽，更加係場場入1球。但面對更強更硬嘅英超中堅，以及利物浦咁多控傳質素高嘅中場，相信加普都係比較多時間遊弋於對手防線前後，搵出突入後方嘅機會，迫近門前。
總括而言，加普喺荷甲嘅進步，令荷蘭國家隊喺前線缺人嘅情況下睇到一線𥌓光，令原先已經備受期待嘅佢，將天賦同實力喺世界盃呢個大舞台展現出嚟，最後加到加盟英超豪門嘅機會。
留言 0