【生活仍要繼續】從盧凱彤之死悟人生道理 何韻詩更加珍惜當下

唱出「生於亂世 有種責任」的她，抱著對社會的一份愛，以實際行動走到前線，過去幾年遇到人生、事業及友情之間的高低起跌，何韻詩開始感受到在壓迫環境下，遇事變得容易忟憎，其實只要處理好件事便會過去，無須執著。

兩個多月前，突然傳來好友盧凱彤離世的消息，令阿詩有感不論是身邊好友、樂迷，甚至港人，也經歷了人生重要的一課。她看到在壓迫的生活環境下，大家漸漸忽略自己，變成壓力越來越大的煲，她覺得不如停下來，好好跟家人朋友重新接駁聯繫的網絡，重燃彼此關懷的心。

阿詩日前於旺角接受專訪時，談到盧凱彤的事，她先沉默一下，其後說：「真係好難去講呢件事，我好認同一個說法，呢次事件令大家重新去諗我哋過嘅生活同日常，其實係咪就係應該咁樣呢？真係冇辦法，喺呢個城市入面大部份嘅人都處於一個好高壓狀態，係咪應該咁，有冇第二啲選擇同生活方式呢？」

面對壓迫生活環境，阿詩深明不是一朝一夕可以改變過來，因為大家習慣了跟人比較，對別人，甚至對自己都好多要求，亦有好多唔好習慣，漸漸構成很多負面思想情緒。好友突然離世，阿詩自言比較幸運，因為近年接觸佛學，令她在近3個月裏面消化方式及速度都會比一些人快少少，當然也在處理情緒當中，但令她最關心反而是歌迷及大眾的心理狀態及怎樣處理這次的大打擊，她說：「生活都係要繼續，要點樣去借呢件事令我哋學識一啲嘢，呢個先係重點。」

人與人之間的情，近年似乎消失了，阿詩覺得無論對身邊的人或是自己，都應該去尋回聯繫，跟家人朋友，甚至不認識的人重新接駁已斷掉的關懷。阿詩日前跟盧凱彤的太太余靜萍為林二汶提早慶祝生日，問到這是否她所言之接駁關懷聯繫？阿詩感觸說：「互相扶持，互相照顧，每一個人都有強有弱嘅地方，冇人可以處理所有嘢，日常都需要朋友幫助同去幫助別人，而呢方面正正係社會失去咗嘅嘢，當然有啲遺憾係要有呢件事發生先提醒，但某程度上，我多咗個責任提自己。」

慢慢消化傷痛心情，阿詩想到用文化、音樂，甚至有滲透力的方法提醒大家，她說：「如果你係歌手、演員、作家，甚至乎係普通市民，有冇方法可以不斷提醒大家（關懷自己及他人）？因為好易忘記。」阿詩比以往更珍惜眼前，這正如她早前思考聖誕節時舉行演唱會名為「我們正在」，就是覺得大家應該好好放眼當下，她說：「好多時我哋識講活在當下，但有冇真係明白去做、真係去實行？似乎又冇。好多時我哋會去擔憂，包括我自己都係，擔憂好多嚟緊發生嘅嘢，後悔冇發生嘅嘢，其實最緊要係o依家、正在發生嘅嘢。」

精選娛聞，喺晒《娛果》
http://fb.com/appledailyent